PS: Berisha, dorëzo dy ministrat

Tiranë, 24 Tetor NOA - Partia Socialiste ngriti sot shqetësimin mbi përhapjen masive të korrupsionit në vend duke theksuar se kjo situatë, është pasqyruar me të njëjtën forcë edhe në Raport Progresin e Komisionit Evropian publikuar vetëm pak ditë më parë.

Sajmir Tahiri, deputet i PS, doli sot para mediave për të denoncuar se korrupsioni është mbizotërues në shumë fusha dhe vazhdon të mbetet një problem veçanërisht serioz.

Tahiri evidentoi më tej se Raport progresi i Komisionit Evropian në tre vitet e fundit e konsideron korrupsionin një fenomen gjerësisht të përhapur dhe një problem veçanërisht serioz.

Ndërkohë që shenja e vetme që ka lënë Sali Berisha në luftën e tij të shtirur ndaj këtij fenomeni, është numri i tij i celularit, - ishte konstatimi i Tahirit.

Në këtë pikë, ai vlerësoi se ka ardhur koha që Sali Berisha ti bindet ligjit njëlloj si të gjithë shqiptarët e ndershëm.

Të dorëzojë menjëherë para drejtësisë 2 ministrat e tij që fshihen pas imunitetit parlamentar, dhe të marrë masa të menjëhershme për të luftuar korrupsionin duke e filluar nga vetja, familja e tij dhe shërbëtorët e oborrit. Kjo është mënyra e vetme për ti treguar shqiptarëve dhe partnerëve tanë ndërkombëtarë vullnetin për të luftuar korrupsionin, - deklaroi Tahiri në emër të Partisë Socialiste.

Tahiri konsideroi se përpjekjet e qeverisë për të luftuar korrupsionin kanë mbetur në fazën e hartimit të strategjive.

Sipas Tahirit, mungojnë mekanizmat e aplikimit të tyre, plani kohor si dhe indikatorët e matjes së rezultateve konkrete.

Shkalla e dënueshmërisë për korrupsion mbetet e ulët, e për më tepër kultura e pandëshkueshmërisë është mbizotëruese. Përfundimi i çështjeve gjyqësore për korrupsion, pavarësisht pozicionit të personave të përfshirë, do të shërbejë si indikator, - ishin shkaqet e cituara nga Tahiri për nivelin e lartë të korrupsionit.

Ky paragraf i përmbledhur i Raport Progresit për çështjen e korrupsionit është praktikisht nota ngelëse që kjo qeveri përtace dhe hajdute ka marrë nga partnerët tanë ndërkombëtarë për dështimin e saj të plotë në luftën kundër korrupsionit.

Këtu, Tahiri vlerësoi se Sali Berisha është i paaftë për të luftuar korrupsionin dhe shtoi: Sali Berisha nuk ka vullnet për të luftuar korrupsionin. Madje më keq se kaq, Sali Berisha duhet të dorëzojë 2 ministra para drejtësisë për të dëshmuar vullnetin e tij në luftën kundër korrupsionit.

f.sh/NOA