PS-PD përplasen për ligjin e SHISH-it

Partia Socialiste reagoi dje ashpër pas miratimit të ligjit për Shërbimin Informativ Kombëtar në një seancë të cilësuar si sekrete të Komisionit parlamentar për çështjet Ligjore. Selia rozë publikoi procesverbalin e kësaj seance, duke fajësuar Kryetaren e Kuvendit që e ka lejuar zhvillimin e saj. Deputeti socialist, Saimir Tahiri, i kërkoi mazhorancës që të tërheqë ndryshimet e miratuara, ndërkohë që sipas tij, kryetari i Komisionit të Ligjeve, Ilir Rusmali, duhet të japë dorëheqjen. “Në një mbledhje sekrete, larg vëmendjes së opinionit publik, duke shkelur në mënyrë flagrante Kushtetutën dhe Rregulloren e Kuvendit (Neni 35), është mbledhur në fshehtësi të plotë Komisioni parlamentar i Ligjeve dhe ka miratuar projektligjin e SHISH-it, duke shpërfillur thirrjet e Partisë Socialiste, apelin e shoqërisë civile, e madje duke shpërfillur edhe kërkesat e ndërkombëtarëve që më shumë se një herë i bënë thirrje mazhorancës të ndalet”, tha ai. Tahiri iu referua procesverbalit sekret prej 11 faqesh, që sipas tij pasqyron mbledhjen dhe miratimin e p/ligjit të SHISH-it. Ai tha se në këtë procesverbal janë rekordet e mbledhjes në Komisionin e Ligjeve, ku nëpërmjet një debati mediokër e fare formal, deputetët e mazhorancës, së bashku me të dërguarin personal të Kryeministrit, materializojnë vullnetin e Sali Berishës për të kapur SHISH-in e për ta përdorur politikisht atë, siç ka bërë edhe në të shkuarën.

“Kjo procedurë sekrete e miratimit të projektligjeve në mbledhje të fshehta, e për më tepër e miratimit të projektligjit të SHISH-it, të kundërshtuar nga opozita, shoqëria civile, por edhe nga partnerët ndërkombëtarë, është dëshmia e radhës se kjo mazhorancë e ky Kryeministër po synojnë me çdo kusht ta tërheqin vendin në spiralen e një diktature të maskuar, duke njësuar mekanizmat e pushtetit me ato të partisë, dhe duke i përdorur ndaj opozitës e ndaj gjithkujt që kundërshton Sali Berishën dhe mazhorancën”, theksoi Tahiri. Duke vlerësuar se mbledhjet sekrete janë metoda fashiste të vëna në jetë nga deputetë të paguar nga taksat e qytetarëve, por që sillen si guerilë, Tahiri këmbënguli se kjo përforcon dyshimet se, sot më shumë se kurrë, Sali Berisha po synon ta rikthejë SHIK-un famëkeq si institucion dhune e represioni për interesat e tij politike. Nisur nga kjo, deputeti socialist renditi disa kërkesa, duke kërkuar tërheqjen e mazhorancës nga tentativa për të kontrolluar Shërbimin Informativ Shqiptar, dorëheqjen e Rusmalit, si dhe të kërkohet falje për nisma të tilla joserioze. “I bëjmë thirrje mazhorancës, e veçanërisht Kryeministrit, të deklarojë pa asnjë ekuivok tërheqjen pa kushte nga ndryshimet e propozuar për ligjin e SHISH-it, të shkarkojë kryetarin e Komisionit të Ligjeve, anulimin e pasojave (miratimi i p/ligjit për SHISH) që ka sjellë mbledhja e fshehtë e komisionit në kundërshtim me Kushtetutën dhe Rregulloren e Kuvendit (Neni 35), si dhe të kërkojë ndjesë publike ndaj opozitës, shoqërisë civile dhe partnerëve ndërkombëtarë”, nënvizoi Tahiri. Ai këmbënguli se përgjegjësi të drejtpërdrejtë mban Kryetarja e Parlamentit, e cila ka lejuar me vullnet të plotë, apo ka lejuar pa dashje, që nën hundën e saj të zhvillohen mbledhje sekrete në Kuvendin e Shqipërisë nga deputetë të paguar prej taksave të qytetarëve, të japë dorëheqjen e menjëhershme. Ndryshimet për ligjin e Shërbimit Informativ Shtetëror janë kundërshtuar nga selia rozë, e madje në një prej prononcimeve të shumta të kësaj partie është theksuar se është një ndër kushtet që ajo të hyjë në Parlament.