PS, dyshime për fshirjen e bojës matrikulluese

Boja matrikulluese që do të përdoret në zgjedhjet e 8 Majit pritet të kthehet edhe kësaj here në një temë debati dhe kontestimesh mes palëve në këtë proces zgjedhor. Partia Socialiste ka hedhur hije dyshimi dje mbi cilësinë e bojës, ndërsa ka kërkuar sqarime nga Komisioni Qendror i Zgjedhjeve për përgjigjet e pyetjeve që ajo ka shtruar para disa ditësh, për të kontrolluar qëndrueshmërinë e saj në gisht. Përfaqësuesi i Partisë Socialiste, Genci Gjonçaj, ka ngritur sërish këtë problematikë dje, para Komisionit Qendror të Zgjedhjeve, duke kërkuar shpjegime nëse laboratori që ka analizuar bojën ka sjellë përgjigjet për kërkesat e bëra zyrtarisht nga Partia Socialiste. “U bë e disata herë që në këtë tryezë, ju ngre problemin për cilësitë e bojës. Kur jemi pesë ditë para zgjedhjeve, nuk kemi ende një përgjigje. Mund të dimë se kur do investohet KQZ-ja për këtë çështje”, - tha Gjonçaj. Në këtë shqetësim, Gjonçaj është mbështetur dhe nga dy anëtarët e majtë të KQZ-së, Artan Lazaj dhe Dëshira Subashi, të cilët e kanë konsideruar të drejtë insistimin e PS-së për këtë çështje. I menjëhershëm ka qenë reagimi i kryetarit Arben Ristani, i cili edhe një herë i ka sqaruar përfaqësuesit socialistë se PS duhet t’i drejtohet vetë laboratorit, pasi KQZ nga ana e saj ka marrë përgjigje pozitive për kushtet dhe cilësitë që parashikon ligji për bojën. “Nuk është e ndershme që anëtarë të KQZ-së bëjnë të paditurin, ndërkohë që e kanë patur përgjigjen e laboratorit për bojën. Në atë përgjigje thuhet në mënyrë të qartë se nga ekspertiza rezulton se boja ka të gjitha cilësitë e nevojshme që të mos fshihet dhe të dallohet për një kohë të gjatë pas vendosjes së saj në gisht”, - tha Ristani. Por përfaqësuesi socialist Genci Gjonçaj, duke marrë shkas nga ky deklarim i kryetarit, ka deklaruar se PS-së nuk i rezulton i njëjti rezultat mbi cilësitë e bojës. “Zoti kryetar, mua më vjen mirë që ju paskeni një përgjigje, por ne nuk na rezulton se boja ka këto veti dhe cilësi që thoni ju”, - tha Gjonçaj. Ndërkohë që burime pranë PS-së kanë sqaruar dje se nga eksperimentet e kryera me bojën, rezulton se ajo mund të fshihet shumë lehtë dhe me ujë nga gishti, nëse ky veprim kryhet brenda një kohe të shkurtër pas vendosjes së saj.