Palestinezët i ofruan pjesë të mëdha toke Izraelit?

Disa dokumente të publikuara nga Al-Xhazira kanë trazuar ujërat në Lindjen e Mesme. Zyrtarët më të lartë palestinezë mohojnë vërtetësinë e dokumenteve të publikuara nga Al-Xhazira, të cilat pretendojnë se ata i kanë ofruar lëshime të mëdha Izraelit.
 

Dokumentet thonë se palestinezët u ofruan që Izraeli të mbajë pjesë të mëdha të pushtuar ilegalisht të Jerusalemit Lindor, ofertë të cilën me sa duket Izraeli e ka refuzuar.

Por kreu i negociatorëve, Saeb Erekat, theksoi se dokumentet ishin “një paketë me gënjeshtra”.

Al-Xhazira thotë se ka 16,076 të dhëna konfidenciale të takimeve, e-maileve, komunikimeve mes palestinezëve, izraelitëve dhe liderëve amerikanë nga vitet 2000-2010.

Palestinezët raportohen të ketë propozuar që tokat e shenjta të merren nën kontroll nga ndërkombëtarët dhe të kufizohet numri i refugjatëve që kthehen në 100 mijë në 10 vjet.

Dokumentet mendohet të kenë rrjedhur nga pala palestineze, por Erekat ngul këmbë se “ne nuk kemi lëvizur nga pozicionet tona”.