Parcelat me kanabis, prangoset kryeplaku i komunës Koman

Dy persona janë prangosur pasi janë të dyshuar për posedimin në bashkëpunim të tre parcelave të mbjella me lëndë narkotike.Të arrestuarit janë Josif Gjonej, vjeç 47, kryeplak i fshatit Koman të komunës së Temalit dhe Aleks Gjonej, vjeç 34, lindur në Koman dhe banues në këtë fshat. Arrestimi i këtij të fundit u bë pasi u mor nën hetim për veprën penale të "Kultivimit të bimëve narkotike", pasi më datën 19. 08. 2009 nga ana e forcave të policisë së Pukës, në vendin e quajtur "Bjeshkët e Komanit", në territorin e fshatit Koman janë gjetur tre parcela të mbjella me bimë narkotike kanabis sattiva, gjithsej 600 rrënjë të cilat pasi u shkulën, u dogjën me zjarr. Ndërsa arrestimi i Josif Gjonejit u bë pasi u mor nën hetim për veprat penale të "Shpërdorimit të detyrës" dhe "Moskallëzimit të krimit" në lidhje me mosnjoftimin për tre parcelat e gjetura në territorin që ai mbulon si kryeplak.