Peleshi takim në Vatikan me papa Leonen XIV

TIRANË, 25 qershor /ATSH/ Kryetari i Kuvendit, Niko Peleshi, u takua në Vatikan me Atin e Shenjtë, papa Leonen XIV.

Takimi ishte një moment i veçantë që rikonfirmoi marrëdhëniet shumë të mira ndërmjet Shqipërisë dhe Selisë së Shenjtë, të mbështetura mbi respektin dhe vlerat e përbashkëta si edhe vlerësimin për kontributin e Selisë së Shenjtë dhe Atit të Shenjtë për dialogun e bashkëpunimin për mbrojtjen e paqes, mirëqenies dhe sigurisë.

Kryetari i Kuvendit i dorëzoi Atit të Shenjtë një dhuratë simbolike nga Shqipëria, si shprehje e miqësisë dhe respektit nga populli shqiptar.

Përmes saj u sollën në vëmendje lidhjet historike ndërmjet Shqipërisë dhe Selisë së Shenjtë, duke kujtuar figurën e papa Klementit XI, Gjon Françesk Albanit, me origjinë arbërore, dhe kontributin e tij në mbështetje të përpjekjeve kombëtare shqiptare për liri e pavarësi.

Shqipëria mbetet një shembull i harmonisë, tolerancës dhe bashkëjetesës fetare, vlera që janë pjesë e identitetit tonë kombëtar dhe një kontribut i çmuar për qytetërimin.

Në këtë takim, Kryetari i Kuvendit shoqërohej nga zëvendëskryetari Agron Gjekmarkaj, deputetët Iris Luarasi dhe Ermal Pacaj, si edhe ambasadorja e Shqipërisë pranë Selisë së Shenjtë, Majlinda Frangaj.

1 nga 7

/gj.m/r.e/a.f/