Pensionohet Gary Neville

Mbrojtësi legjendar i Manchester Unitedit, Gary Neville, i ka dhënë fund karrierës si futbollist aktiv.

Neville iu bashkëngjit Unitedit në vitin 1991 dhe i qëndroi besnik skuadrës në të cilën kaloi 20 vite të karrierës së tij.

36-vjeçari është paraqitur 602 herë me fanellën e Manchester Unitedit, ndërsa gjatë kësaj periudhe ka shënuar vetëm shtatë gola, duke qenë se ai ishte mbrojtës.

Gjatë qëndrimit te Djajtë e Kuq, Neville e ka fituar Ligën e Kampionëve, tetë tituj të Premier Ligës, tre Kupa FA, dy Kupa të Ligës, Kupën Ndërkombëtare dhe Kupën e Botës për Klube. Nga viti 2005 ishte kapiten i Manchesterit.

Me kombëtaren e Anglisë është paraqitur nga viti 1995 deri në vitin 2007, ka luajtur në dy Kampionate Botërore (1998 dhe 2006) dhe në tre Kampionate Evropiane (1996, 2000 dhe 2004).