Përkeqësim raportesh me SHBA-Rusi?

Ministri i jashtëm rus Sergei Lavrov ka thënë se legjislacioni i propozuar nga senatorët amerikanë për vdekjen në burg të Sergei Magnickit do të dëmtojë raportet mes SHBA-së dhe Rusisë.

Lavrov, në një adresim televiziv, e quajti projektligjin si “anti-rus” dhe një përpjekje për “të ndërhyrë” në punët e brendshme të Rusisë.

Magnicki një avokat 37 vjeçar, ka vdekur ndërsa ishte në paraburgim në vitin 2009, pasi kishte përfshirë zyrtarë të lartë rusë në një skemë mashtrimi.

Atij i është refuzuar vazhdimisht dhënia e ndihmës mjekësore.

Këtë javë, Rusia hodhi poshtë akuzat kundër njërit prej dy mjekëve të arrestuar, të akuzuar se kanë shkaktuar vdekjen e Magnickit për shkak të neglizhencës së tyre.

Legjislacioni i propozuar parashikon sanksione kundër zyrtarëve rusë që kanë kryer shkelje të të drejtave të njeriut.