Përkeqësohet gjendja shëndetësore e Mubarakut

Gjendja shëndetësore e ish-presidentit të Egjiptit, Hosni Mubarak, është mjaft e rëndë dhe ai herë pas here po e humb vetëdijen, që nga koha kur është dërguar në një spital në Kajro.

Një përfaqësues i shërbimeve të sigurisë theksoi se Mubarak është vizituar nga bashkëshortja e tij, Suzana, pasi që ishte përhapur lajmi se ish-presidenti i Egjiptit ka vdekur.

Mubarak më 2 qershor u dënua me burgim të përjetshëm, për shkak të vrasjes së protestuesve gjatë demonstratave vitin e kaluar, ndërsa prokuroria kishte kërkuar dënimin me vdekje.

Në procesin që filloi në gush të vitit 2011, prokuroria ofroi dëshmi se Mubarak kishte dhënë urdhër për të hapur zjarr kundër protestuesve.