Përmet, ndalohet një 49 vjeçare, kultivuese hashashi

Efektivat blu të policisë së Përmetit kanë vendosur në pranga një 49 vjeçare nga rrethi i Përmetit e cila kërkohej nga policia pasi kishte mbjellë hashash në tokën bujqësore, pronë të saj. Sipas burimeve zyrtare në Drejtorinë e Policisë në Gjirokastër, “specialistët e Seksionit të Luftës Kundër Drogës kanë bërë ndalimin e 49 vjeçares Gjylystane Elmazi, lindur dhe banuese në fshatin Alipostivan, të rrethit Përmet”. Ajo ishte shpallur person në kërkim pasi Gjykata e Rrethit Gjyqësor Gjirokastër, në datën 26 shkurt 2008, e ka dënuar këtë shtetase me 2 vjet burg për veprën penale të “Kultivimit të bimëve narkotike”. “Ndalimii Gj.Elmazit është bërë nga policia në banesën e saj”, thotë zëdhënësi i policisë së Gjirokastrës, Gentian Mullai. Në verën e vitit 2007 gjatë një kontrolli që ka ushtruar policia në fshatin Alipostivan ka rezultuar se 49 vjeçarja kishte mbjellë hashash në një sipërfaqe bujqësore, pronë të saj.