Po rrezikohet trashëgimia osmane

Në Hamamin e Gazi Mehmet Pashës në Prizren, në mbrëmjen e 10 majit u hap ekspozita “A Balkan Tale”, pjesë e projektit rajonal me të njëjtin emër, që financohet nga Komisioni Evropian. Në ekspozitë, përmes 50 fotografive nga pesë shtete të Ballkanit, të realizuara nga pesë fotografë, paraqiten objektet e trashëgimisë osmane në rajon. Fotografitë e ekspozuara janë një dokumentim i këtyre vlerave që kërkojnë vëmendje të shtuar ndaj parandalimit të degradimit të tyre dhe një thirrje për kujdes institucional dhe shoqëror. Në hapjen e ekspozitës është dhënë premierë dokumentari “Silent Balkans”, një realizim i përbashkët i partnerëve të këtij projekti që përçon porosinë e të kaluarës së përbashkët të popujve të Ballkanit si një mjet për të ardhmen paqësore të tyre.

Në emër të partnerit implementues të projektit për Kosovën, OJQ “Ec Ma Ndryshe”, Hajrulla Çeku në fjalën e tij të hapjes ka treguar se fotografitë dhe dokumentari janë produkte të punës rreth një vjet e gjysmë të partnerëve nga pesë shtete, Greqi, Maqedoni, Serbi, Shqipëri dhe Kosovë. Mysafirët e ekspozitës i kanë përshëndetur edhe Ruzhdi Rexha, nënkryetar i komunës së Prizrenit dhe Vjollca Aliu, drejtore e Departamentit të Trashëgimisë Kulturore në MKRS. Në fjalimet e tyre ata kanë ripërsëritur përkushtimin institucional për mbrojtjen e vlerave të trashëgimisë kulturore dhe janë zotuar për vazhdimin e bashkëpunimit me shoqërinë civile.

Të dhënat e kohëve të fundit tregojnë që trashëgimia kulturore e Periudhës Osmane në vendet e Ballkanit është në rrezik, edhe që konfliktet etnike e fetare vazhdojnë të kërcënojnë rajonin. “A Balkan Tale” synon të stimulojë debatin publik përreth historisë së Ballkanit, të promovojë ndjenjën e historisë së përbashkët të bazuar në fe e bashkekzistencë etnike, si edhe të kontribuojë për aksesin publik edhe për ruajtjen e trashëgimisë kulturore. Është një projekt mediatik në thelb të të cilit qëndron një ekspozitë me 50 fotografi të monumenteve mylsimane, të krishtera e hebreje në Ballkan, të realizuara nga pesë fotografë fitues çmimesh nga Athina, Beogradi, Prizreni, Shkupi e Tirana. Fotografitë shoqërohen me tekste të shkruara nga një skuadër historianësh me emër të të gjithë rajonit, një dokumentar, me programe edukativë, me eskursione historike e konkurs fotografish me pjesëmarrjen e nxënësve të shkollave e të rriturve. Për më shumë rreth projektit, mund të vizitoni balkantale.com.

Ekspozita do të mbetet e hapur deri më 31 maj, ndërsa dyert e Hamamit të Gazi Mehmet Pashës do të jenë të hapura për vizitorët çdo ditë, përveç të dielave. /kosovapress/