Politikani model për Petrit Vasilin? Kush tjetër përveçse Ilir Metës

Petrit Vasili ka dhënë një intervistë të gjatë për GSH, ku rrëfehet për shumë gjëra, duke nisur që nga rinia e tij e deri në ditët e sotme. Dhe, një nga pyetjet që i bëhet, është se kush nga politikanët shqiptarë është model për të. Dhe, nuk i është dashur shumë fantazi për tu përgjigjur.

Natyrshëm Ilir Meta, LSI ka qenë sfida më e jashtëzakonshme e politikës shqiptare në pluralizëm, nuk mund të ishte e tillë pa një politikan model, shprehet Vasili, që të paktën, kur flet për politikanin model të huaj, duket se e ngre pak stekën, duke zgjedhur Bill Klintonin.

Gjatë intervistës ai shprehet se nuk i ka mbetur asnjë peng nga koha që ishte ministër i Shëndetësisë, pasi sipas tij, ka realizuar projekte nga më të paimagjinueshmet. Ndërsa si i përket detyrës së re, atë të nënkryetarit të bashkisë, thotë se është një sfidë e madhe, por ai, si një tiranas i vërtetë, do tja dalë.