Porti i Durrësit/ Meta: Duhet transparencë, po injorohen detyrimet e Marrëveshjes së Stabilizim-Asocimit dhe Procesit të Berlinit

Kryetari i Partisë së Lirisë, Ilir Meta ka përshëndetur qëndrimin e Delegacionit të BE në Shqipëri lidhur me projektin e Portit të Durrësit. Meta vë theksin te nevoja për transparencë, teksa shton se duhen investitorë seriozë strategjikë dhe vendime të mirëkonsultuara me qytetarët, shoqërinë civile dhe ekspertët, në respekt të Kushtetutës, sovranitetit shtetëror mbi infrastrukturën strategjike dhe parimet e konkurrencës, detyrime që siç theksoi ai, burojnë nga Marrëveshja e Stabilizim-Asocimit dhe Procesi i Berlinit.

“E përshëndes qëndrimin e Delegacionit të Bashkimit Europian në Shqipëri lidhur me projektin e Portit të Durrësit dhe ndaj të njëjtat shqetësime, të shprehura edhe më herët, lidhur me nevojën për transparencë.

Shqipëria dhe Durrësi kanë nevojë për investitorë seriozë strategjikë dhe vendime të mirëkonsultuara me qytetarët, shoqërinë civile dhe ekspertët, në respekt të Kushtetutës, sovranitetit shtetëror mbi infrastrukturën strategjike, parimet e konkurrencës, detyrimet që burojnë nga Marrëveshja e Stabilizim-Asocimit dhe Procesi i Berlinit.

Injorimi i këtyre detyrimeve dhe parimeve shumë të rëndësishme të funksionimit të një shteti ligjor, që synon anëtarësimin në BE, do të thotë se interesi i vetëm i kësaj Qeverie të korruptuar dhe të inkriminuar është për një tjetër aferë pas së cilës fshihet një mega-vjedhje dhe pastrim parash”, shkruan Meta në rrjetin social Facebook.

/rtsh.al/