Presidenca e BE-së, Bildt: Shqipëria po përmbush kriteret e vizave

Presidenca Suedia e BE-së vlerëson progresin e bërë nga Shqipëria në përmbushjen e kritereve për liberalizimin e vizave si dhe për hapat e bërë në drejtim të integrimit evropian. Ministri i Jashtëm suedez, Carl Bild, shprehu dje mbështetjen e plotë të Suedisë për të dyja këto procese, duke theksuar se Suedia mbështet heqjen e vizave për shqiptarët dhe integrimin e plotë të saj në BE. Gjatë pjesëmarrjes në ministerialin e OSBE-së që po zhvillohet në Athinë, zv.kryeministri dhe ministri i Jashtëm, Ilir Meta, u takua gjithashtu edhe me ministrin e Punëve të Jashtme të Suedisë, z. Carl Bildt, gjatë Këshillit Ministerial të OSBE-së që po zhvillohet në Athinë. Gjatë pjesëmarrjes në ministerialin e OSBE që po zhvillohet në Athinë, zv.kryeministri dhe ministri i Punëve të Jashtme, z. Ilir Meta, zhvilloi një takim të veçantë me ministrin e Punëve të Jashtme të Suedisë, z. Carl Bildt, vendi i të cilit mban Presidencën aktuale të Bashkimit Evropian. Gjatë takimit u diskutua për progresin e Shqipërisë në procesin e integrimit evropian dhe në liberalizimin e vizave si dhe për marrëdhëniet dypalëshe dhe politikën e saj rajonale. Z. Meta shprehu vlerësimin e qeverisë shqiptare për angazhimin e suksesshëm të Presidencës suedeze në avancimin e axhendës së integrimit të vendeve të Ballkanit Perëndimor dhe në veçanti për mbështetjen suedeze për miratimin e aplikimit të Shqipërisë në takimin e ministrave të Punëve të Jashtme të BE-së. Gjithashtu, z. Meta shprehu gatishmërinë e qeverisë shqiptare për të ndërmarrë në kohë dhe me efikasitet të plotë të gjitha reformat që kërkon procesi i integrimit në BE. Nga ana e tij, z. Bildt vlerësoi përqasjen konstruktive të politikës së jashtme shqiptare në rajon dhe u shpreh se Shqipëria është një faktor stabiliteti në Ballkan. Po dje, z. Meta zhvilloi një takim të veçantë me ministrin e Punëve të Jashtme të Federatës Ruse, z. Sergei Lavrov. Gjatë këtij takimi u shkëmbyen mendime për zhvillimet në rajon dhe u diskutua për të ardhmen e tij. Gjithashtu z. Meta dhe z. Lavrov diskutuan për mundësitë e rritjes së bashkëpunimit në nivel dypalësh dhe për realizimin e disa marrëveshjeve të rëndësishme në fusha me interes reciprok. Dy bashkëbiseduesit shprehën mbështetjen për shkëmbimin e mendimeve edhe në organizatat ndërkombëtare, ku të dy vendet janë anëtare. Në Athinë po dje ministri i Punëve të Jashtme u takua edhe me Sekretarin e Përgjithshëm të Asamblesë Parlamentare të OSBE-së, z. Joao Soares, dhe me Drejtorin e ODHIR-it, z. Janez Lenarcic. Nga ana e përfaqësuesve të OSBE-së u mirëpritën hapat që ka ndërmarrë qeveria shqiptare për të risjellë opozitën brenda institucionit të Parlamentit si dhe u vlerësua gatishmëria e saj për t’i ofruar opozitës shumicën dhe kryesimin e Komisionit Hetimor Parlamentar si dhe një rol drejtues në procesin e reformës zgjedhore. Z. Meta mbajti dhe një fjalim në takimin e 17-të të Këshillit Ministror të OSBE-së, ku i njohu të pranishmit me reformat integruese të vendit dhe hapat që po ndjek qeveria për rikthimin e opozitës në Kuvend. “Gjatë këtij viti, Shqipëria ka shënuar arritje të rëndësishme që janë “gurë kilometrikë” në procesin e saj të integrimit euroatlantik; jo më pak e rëndësishme ishte dhe organizimi i zgjedhjeve parlamentare të muajit qershor, të cilat përmbushën shumicën e standardeve të OSBE-së. Si rrjedhojë e votës popullore, Shqipëria tani qeveriset nga një koalicion partish, të cilat janë tejet të përkushtuara dhe po punojnë shumë për të jetësuar aspiratën e gjatë të popullit shqiptar e në mënyrë të veçantë, integrimin në BE”, - tha z. Meta. Ai informoi se “në këto përpjekje, qeveria e tanishme do të mbështetet në zhvillimet inkurajuese në stadin e tanishëm të marrëdhënieve të saj me BE-në që rezulton pas kërkesës për anëtarësimin e Shqipërisë në BE dhe vendimit më të fundit të Këshillit për të kërkuar opinionin e Komisionit Evropian mbi gatishmërinë e Shqipërisë për t’u bërë vend kandidat. Shqipëria e vlerëson këtë vendim dhe po bën përgatitjet e duhura për të realizuar hapat e mëtejshëm në këtë proces, që ne presim ta kthejë Shqipërinë në një vend kandidat për në BE, brenda afatit më të shpejtë të mundshëm kohor”.