Presidenti Nishani: Do të zbatoj Kushtetutën për dekretimin e qeverisë së re

Ligji themeltar sqaron në detaje hapat dhe procedurën

Seanca e parë e legjislaturës së ardhshme e do të mblidhet të hënën e ardhshme, datë 9 shtator. Kushtetuta sqaron në detaje hapat për thirrjen e deputetëve të zgjedhur në seancë plenare. Neni 67 i saj, saktëson se “Presidenti i Republikës e mbledh Kuvendin e porsazgjedhur jo më parë se data e përfundimit të mandatit të Kuvendit paraardhës, por jo më vonë se 10 ditë pas mbarimit të këtij mandati”. Nga Vlora, kreu i shtetit Bujar Nishani, theksoi se do të respektojë përcaktimet kushtetuese në raport me pushtetin legjislativ.
Pas mbledhjes së seancës së parë plenare të legjislaturës së re, Presidenti i Republikës, është i detyruar nga ligji themeltar i shtetit të emërojë Kryeministrin me propozim të partisë ose koalicionit të partive, që ka shumicën e vendeve në Kuvend.
Neni 97 i Kushtetutës, saktëson se kryeministri i emëruar i paraqet për miratim Kuvendit, brenda 10 ditëve, programin politik të Këshillit të Ministrave së bashku me përbërjen e tij. Kabineti qeveritar, emërohet dhe shkarkohet nga Presidenti i Republikës, me propozim të Kryeministrit, brenda 7 ditëve. Ndërkohë që dekreti presidencial shqyrtohet brenda 10 ditëve nga Kuvendi. Sipas nenit 99 të Kushtetutës, para fillimit të detyrës, Kryeministri, zëvendëskryeministri dhe ministrat betohen para Presidentit të Republikës.