Projekte turistike për Dardhën, Bashkia ndërhyn për shtimin e aktiviteteve argëtuese

Fshati turistik i Dardhës do i nënshtrohet një sërë ndërhyrjeve nga ana e bashkisë së Korçës për ti dhënë më shumë hijeshi por edhe për të siguruar më shumë shërbime për turistët e vizitorët e shumtë.

Sipas kryebashkiakut të Korçës së shpejti do të ri konstruktohet “godina e pleqësisë” së fshatit Dardhë, çka do të realizohet me fondet IPA të Bashkimit Evropian, projekt i cili është fituar nga bashkia.

Ndërkohë në bashkëpunim me Fondin Shqiptar të Zhvillimit do të ndërtohet një zip-line, si dhe disa shtigje turistike.

“Projekti i radhës është një projekt që kemi aplikuar nga fondet IPA të Bashkimit Evropian, për të rikonstruktuar “godinës e pleqësisë” të  Dardhës dhe për të dhënë asaj një funksion të shërbimit turistik të këtij fshati. Ndërkohë edhe projekte të tjera në bashkëpunim me Fondin Shqiptar të Zhvillimit do të realizohen së shpejti siç është ndërtimi i një zip-line si dhe disa shtigje turistike”, u shpreh  Sotiraq Filo, Kryetar i Bashkisë Korçë.

Fshati Dardhë prej vitesh ka një profil turistik. Si në verë ashtu edhe në dimër dardha është mjaft e frekuentuar nga turistët e vizitorët të cilët tashmë do të kenë edhe më shumë aktivitete argëtuese për të kryer gjatë ndalesës në këtë fshat.

/rtsh.al/