“Protesta të dhunshme antiqeveritare kanë shpërthyer në Shqipëri” – Mediat franceze: Rrugët e Tiranës po ziejnë nga zemërimi kundër Edi Ramës

Për revoltën studentore, që ka “pushtuar” Tiranën, kanë shkruar edhe mediat franceze si “Le Monde” apo “Le Figaro”.

“Le Figaro” shkruan se që nga e marta kryeqyteti shqiptar është kthyer në epiqendrën e një lëvizjeje të madhe të udhëhequr nga të rinjtë, të cilët sulmuan ndërtesa qeveritare dhe biznese të shumta nëpër rrugë.

“Zemërimi vazhdon të ziejë në Shqipëri. Që nga e marta,  Tirana  ka qenë epiqendra e një lëvizjeje të madhe proteste të udhëhequr nga të rinjtë e vendit. Demonstratat u përshkallëzuan shpejt në përleshje me  forcat e sigurisë. Vonë natën, gazi lotsjellës dhe topat e ujit iu përgjigjën sulmeve me gurë dhe koktej molotovi në qendër të qytetit.

Pushteti politik është qartësisht shënjestra, me ndërtesa të shumta zyrtare të synuara nga protestuesit: nga zyrat e Kryeministrit deri te Parlamenti, Gjykata Kushtetuese dhe zyrat ministrore të Financave, Brendshme dhe Energjisë. Një kat i Ministrisë së Arsimit madje u dogj. Pas tre ditësh protestash, thuhet se janë arrestuar disa dhjetëra persona, sipas mediave lokale.”, shkruan Le Figaro.

Ndërsa “Le Monde” shkruan se mijëra demonstrues u mblodhën në Tiranë për të kërkuar kushte më të mira në universitet dhe dorëheqjen e kryeministrit Edi Rama. Për orë të tëra, policia përdori ujë dhe gaz lotsjellës ndërsa demonstruesit sulmuan zyrat qeveritare dhe u vunë flakën disa ndërtesave.

“Protestat antiqeveritare në kryeqytetin e Shqipërisë lanë disa ndërtesa zyrtare të dëmtuara rëndë dhe të paktën një në flakë të mërkurën, më 14 tetor, ndërsa demonstratat u përshkallëzuan në dhunë për natën e dytë radhazi.

Protestuesit dhe policia e trazirave u përleshën në Tiranë, ndërsa mijëra demonstrues u mblodhën për kushte më të mira universitare dhe kërkuan dorëheqjen e kryeministrit Edi Rama.”, shkruan Le Monde.