Protestuesit i vënë zjarrin Bashkisë së Tiranës, protestuesit futen brenda godinës

Situata është tensionuar në orët e mbrëmjes gjatë protestës së studentëve dhe të rinjve, e cila nisi në orën 14:00 para Ministrisë së Arsimit.

Pas shpërndarjes nga Rruga e Durrësit, protestuesit janë zhvendosur drejt Bashkisë së Tiranës, ku kanë thyer dyert e godinës dhe kanë hyrë në ambientet e brendshme të institucionit.

Fillimisht, protestuesit kanë hedhur gurë në drejtim të hyrjes së bashkisë, derisa kanë arritur të thyejnë derën. Më pas, ata kanë vijuar hedhjen e gurëve drejt godinës dhe kanë ndezur flakadanë.

Disa prej protestuesve kanë hyrë brenda institucionit, ndërsa pak çaste më vonë në vendngjarje kanë mbërritur edhe forcat e policisë.

Përshkallëzimi i situatës në Bashkinë e Tiranës vjen pas disa orësh protestash dhe përplasjesh, fillimisht para Ministrisë së Arsimit, ku studentët dhe të rinjtë kërkojnë zgjidhje për problematikat që lidhen me arsimin.