Qeveria: Drejtësia duhet të jetë e pavarur

Qeveria e Republikës së Kosovës ka mbështetur sot ish-kryeministrin Ramush Haradinaj.

Në një komunikatë për media, Qeveria e Republikës së Kosovës, ka theksuar se është duke përcjell më vëmendje të veçantë procesin në Tribunalin e Hagës ndaj ish-komandantit të Zonës Operative të Dukagjinit të UÇK-së, Ramush Harandinaj dhe bashkëluftëtarëve të tij, Lahi Brahimaj dhe Idriz Balaj.

“Qeveria dhe të gjitha institucionet e vendit kanë respektuar çdo bashkëpunim me Tribunalin e Hagës dhe në këtë kuadër Republika e Kosovës është shembull i mirë i bashkëpunimit me drejtësinë ndërkombëtare. E ritheksojmë se Qeveria dhe populli i Kosovës gjithmonë kanë besuar në drejtësinë ndërkombëtare dhe në luftën e drejtë të Ushtrisë Çlirimtare të Kosovës”, thuhet në deklaratën e Qeverisë.

Qeveria e Republikës së Kosovës rithekson se drejtësia duhet të jetë e pavarur, e paanshme dhe profesionale, dhe të mos ndikohet nga askush, e as nga politika.

Sipas ekzekutivit, Deklaratat e zyrtarëve të lartë institucionalë të Serbisë janë tendencë për të ndikuar në vendimin e Tribunalit të Hagës për rastin e Haradinajt, transmeton RTK

“Qeveria e Republikës së Kosovës ka qenë e kujdesshme në deklarimet lidhur me proceset gjyqësore në Hagë. Kërkojmë që edhe autoritetet e Serbisë dhe të tjerët të jenë të përmbajtur dhe të mos tentojnë të ndikojnë në vendimet gjyqësore”, thuhet në deklaratën e Qeverisë.

Qeveria e Republikës së Kosovës beson se Tribunali i Hagës do të merr vendim të drejtë dhe të pandikuar./Indeksonline/