Qeveria i hap rrugë licencës së dytë për rrjetin 3G në Shqipëri. Kompanitë celulare do ulin ende tarifat

Licenca tjetër 3G edhe kjo do të ndikojë shumë pozitivisht, në çmimet, në shërbimet dhe në shfrytëzimin e të gjitha potencilave që ofron lundrimi në internet. Me kompanitë celulare marrëdhëniet janë shumë të mira, por presim një qëndrim të ri ndaj sms-ve sepse tarifat janë ende për tu ulur me tutje

Kryeministri Sali Berisha informoi sot, gjatë mbledhjes së Këshillit të Ministrave se është autorizuar licenca e dytë për rrjetin 3G, në Shqipëri. Kryeministri e vlerësoi këtë si një lajm shumë pozitiv për të gjithë shqiptarët, të cilët kanë një nga përdorimet më të gjera në Evropë, të telefonisë mobile.
Lidhur me këtë, kryeministri Berisha u shpreh: “Sot ministri Pollo më informoi se bashkë me AKEP kanë autorizuar licencën e dytë për 3G dhe ky është një lajmë shumë i gëzuar, pozitiv, për shqiptarët dhe Shqipërinë, të cilët kanë një nga përdorimet më të gjera në Evropë të telefonisë mobile.
Faktikisht të internetit, të kompjuterit në xhep dhe sidomos tani me e-cloud të Steve Jobs, një revolucion i dytë i madh u njoftua dje, në San Francisko. E merrni me mend ju që të gjitha të dhënat e aparateve tuaja, mund t’i depozitoni në një re që askush nuk e di përveç jush, qoftë një i-phone, i-pad, çfarëdo që të jete dhe 3G është faktikisht rruga më e sigurtë e këtij komunikimi.

Telefonia mobile ka njohur një zhvillim të madh rreth dy muaj më parë. Portabiliteti i numrit dhe ka nisur një shfrytëzim masiv i kësaj mundësie që në të vërtetë e ndez garën dhe konkurrencën në mënyrën më të ndershme dhe më të fuqishme. Licenca tjetër 3G edhe kjo do të ndikojë shumë pozitivisht, në çmimet, në shërbimet dhe në shfrytëzimin e të gjitha potencilave që ofron lundrimi në internet. Me kompanitë celulare marrëdhëniet janë shumë të mira, por presim një qëndrim të ri ndaj sms-ve sepse tarifat janë ende për tu ulur me tutje.

Enti Rregullator i vendit ka bërë studime dhe do të bëjë në përputhje me ligjet e vendit dhe ligjin ndërkombëtar, ndërhyrjen e tij, por sidoqoftë unë i ftoj ata t’i shqyrtojnë në interesin më të mirë të tyre, ti shqyrtojnë të gjitha këto tarifa të cilat po ulen  në mënyrë të ndjeshme, por dhe përdorimi i kësaj telefonie po rritet në mënyrë të ndjeshme. Sidoqoftë 3G është një lajm i mirë për të gjithë qytetarët, të cilët me fillimin  e funksionimit të licencës së dytë do të kenë një garë më të hapur, një konkurrencë më të drejtë, më të ndershme dhe natyrisht një ulje më të sigurtë të çmimeve të shërbimeve që ofron rrjeti 3 G, i cili ëhstë aktualisht rruga më e mirë e përcjelljes së internetit dhe shërbimeve të tij.