Qiellgërvishtëset kanë lidhje me krizat financiare
Ka një lidhje mes ndërtimit të qiellgërvishtësve dhe krizave financiare. Në këtë përfundim arrin një studim i Barclays Capital. Sipas BBC, shembujt më të mirë janë ai i Empire State Building, që u ndërtua ndërsa Depresioni i Madh ishte në rrugë e sipër. Kulla më e lartë në botë, Burj Khalifa u ndërtua pak përpara krizës në Dubai, që desh e çoi atë në falimentim.
Kina është aktualisht ndërtuesi më i madh i qiellgërvishtësve në botë, thotë banka Barclays.
India po ashtu ka 14 qiellgërvishtëse në ndërtim e sipër.
Në studim thuhet se qiellgërvishtësja e parë në botë, Equitable Life, u ndërtua në New York në vitin 1873 dhe koincidoi me një recesion 5 vjeçar. Ajo u shkatërrua në vitin 1912.
Po kështu Willis Tower në Chicago u ndërtua në vitin 1974, që përkoi me një krizë të fortë të naftës dhe dollarit.
Kurse Petronas Tower në Malajzi u ndërtuan pikërisht në periudhën e krizës financiare në Azi.
Tani investitorët mund të kenë pak frikë sepse Kina është në radhë. Ajo po ndërton 53 përqind të qiellgërvishtësve në botë.