RENEA në burgun 313, dyshime se Dritan Dajti do arratiset

Telenovela Dritan Dajti kryqëzon drejtësinë Shqiptare duket se po vazhdon me surprizën e radhës, ku i akuzuari për vrasjen e katër efektivëve të Policisë në Durrës, edhe përtej dyerve të Gjykatës ka vënë në lëvizje të plotë Policinë e Shtetit dhe për më tepër ka angazhuar forcat speciale RENEA, që të jenë në gadishmëri të tij. Me një urdhër të veçantë Drejtori i Përgjithshëm i Policisë së Shtetit, që prej 20 ditësh, ka urdhëruar një grup të posaçëm të forcave speciale RENEA në ambientet e brendshme të burgut 313 në Tiranë për të ruajtur Dritan Dajtin. Burime pranë uniformave blu bëjnë me dije se prezenca e forcave speciale lidhet me një informacion të mbërritur në Shërbimin e Kontrollit të Brendshëm se një prej të burgosurve VIP ka planifikuar arratisjen gjatë muajve korrik-gusht. Burime nga policia konfirmojnë se bëhet fjalë për të dënuarin Dritan Dajti, i akuzuar për masakrën e Durrësit, ku u vranë katër policë në gusht të 2009-ës. Mësohet se prej gati 20 ditësh një grup i forcave speciale RENEA me tre turne janë dislokuar në ambientet e brendshme të burgut të sigurisë së lartë 313, ku qëndrojnë kryesisht në oborrin e burgut dhe vërejnë çdo lëvizje të Dajtit, me urdhër të Drejtorit të Përgjithshëm të Policisë. Ende nuk jepet informacion i detajuar për planin e arratisjes së tij, që është zbuluar nga informacionet e SHKB-së. Kujtojmë se në burgun 313, i cili konsiderohet edhe burg i sigurisë së lartë, vuajnë dënimin disa prej të akuzuarve më të rrezikshëm, që ende janë në gjykim në çështjet më të përfolura si Dritan Dajti, Ilir Xhakja etj.