Radha e gjatë e vonesa, masakrohet punonjësja e aplikimit për pasaporta

Tepelenë, 18 gusht, NOA Radhët e gjata në zyrat e aplikimit për pasaportat dhe kartat e identitetit ka bërë që një qytetar ta humbasë durimin dhe të masakrojë me grushte dhe shkelma një prej punonjësve të kompanisë Aleat.

Ngjarja e rëndë ka ndodhur dje në qytetin e Tepelenës dhe autori është 30 vjeçari Kastriot Meta. Shkak i reagimit të tij të dhunshëm ka qenë fakti se punonjësja e kompanisë ka debatuar dy ditë më parë më të ëmën e tij për vonesën e shkaktuar në aplikimin për dokumentet e identifikimit.

30 vjeçari duket se nuk e ka duruar dot faktin që nëna e tij ka qëndruar për orë disa orë në zyrat e gjendjes civile ndaj dje rreth orës 14.00, ka shkuar në ambientet e Bashkisë Tepelenë dhe ka hyrë në zyrat ku bëhet aplikimi për pasaporta dhe karta identiteti.

Pas debateve të para me punonjësen e kompanisë Aleat: shtetasen A. C nga Tepelena, Meta e ka fyer dhe e ka goditur atë me grushte dhe me shkelma duke i shkaktuar asaj dëmtime të rënda.

Policia sqaron se është dashur ndërhyrja e punonjësve të Bashkisë Tepelenë dhe më pas e Patrullës së Përgjithshme të Policisë së Komisariatit të Policisë Tepelenë, për të izoluar këtë shtetas dhe mos lejuar më tej të godiste punonjësen e pasaportave e cila ishte në krye të detyrës.

Shkaku i debatit ku më pas kaloi në dhunë fizike ishte se nëna e shtetasit Kastriot Meta një ditë më parë ka shkuar për të aplikuar për pasaportë ku ka debatuar me punonjësen e pasaportave për arsye të vonesës dhe për këtë ky shtetas shkoi për të sqaruar pasi pretendonte se nënën e tij e kishte fyer punonjësja e pasaportave, thuhet në njoftimin e Policisë.

Ndaj Metës ka nisur ndjekja penale veprën penale Goditje për shkak të detyrës

NOA