Raketa indiane kërcënon Kinën

India ka testuar të enjten një raketë që mund të bartë mbushje bërthamore. Raketa ka rrezeveprim deri në dy qytetet më të mëdha kineze, Pekin e Shangaj. Është ky hapi i parë konkret drejt synimit indian për t’u bërë fuqi e rëndësishme rajonale e botërore.

Raketa Agni-V, me një rrezeveprimi prej 5,000 kilometrash, ka nevojë edhe për teste shtesë, dhe për mënjanimin e pengesave burokratike, para se të bëhet pjesë e arsenalit ushtarak të Indisë – diku gjatë viteve të ardhshme. Por, zyrtarët indianë e cilësuan lancimin e saj si një provë se vendi tashmë ka hyrë në radhën e shteteve më të fuqishme, si dhe më përparimtare në akseptin shkencor.

"Kombi ynë nga sot është më i madh”, deklaroi për mediat indiane ministri indian i Mbrojtjes, A.K. Antony.

Ndryshe, testimi i raketës erdhi pak ditë pas testit të pasuksesshëm të raketës verikoreane, e cila nxiti reagime të shumta negative në botë ndaj regjimit në Pyngyang, që vazhdon të mbetet i izoluar nga bashkësia ndërkombëtare.