Rama nga Mallakastra: Qeverisja e PS me atë të PD-së, ndryshon si dita me natën!
Kryetari i PS dhe kryeministri Edi Rama, ka vazhduar fushatën zgjedhore në Mallakastër, ku prezantoi kandidatin për zgjedhjet e 14 majit, Qerim Ismailajn.
Zoti Rama u tha qytetarëve se në qershor do të marrë fund problematika me ujin e pijshëm, pasi në qershor të gjitha banesat do të furnizohen 24 orë me ujë.
“Me vendosjen e sahateve të rinj që kanë filluar, nga qershori do të fillojë të sjellë 24 orë ujë të pijshëm në shtëpitë tuaja ujësjellësi i ri. Një kërkesë e kahershme, por më në fund edhe kjo e plotësuar”, tha kryeministri Rama.
Ai premtoi ndërkaq edhe investime në infrastrukturë.
Duke u bëri thirrje qytetarëve që të 14 maj të shkojnë në kutitë e votimit dhe të hedhin votën për socialistët, zoti Rama tha se qeverisja e PS me atë të PD-së, ndryshon si dita me natën. Ai tha se sa herë që demokratët kanë marrë pushtetin, si atë vendor edhe atë qendror, kanë treguar se e çojnë vendin mbrapa.
“Historia 30 vjeçare duhet të na i ketë mësuar disa gjëra. Sa herë u është dhënë mundësia të marrin në dorë fatet e një vendi, gjithmonë, vendi, bashkia, komuna kanë bërë mbrapa. Sa herë na është dhënë neve mundësia kanë bërë para” tha kryeministri. Ne mund të bëjmë më shumë, ne nuk i kemi bërë të gjitha mirë. Por të krahasosh ne me ata, është njësoj si të krahasosh ditën me natën”, tha Rama.
/ rtsh.al /