Reagimi zyrtar i PD/“Edi Rama i sëmurë psikik, dëmtoi imazhin e vendit në Vjenë”

Deputeti i Partisë Demokratike Gerti Bogdani ka deklaruar se Edi Rama ka dëmtuar imazhin e vendit me aktin çnjerëzor në Akademinë diplomatike në Vjenë kur dhunoi diplomatin Egin Ceka.
Në një konferencë për shtyp deputeti Bogdani theksoi se, “Edi Rama dje në Vlorë  përgënjeshtroi Edi Ramën e Tiranës të  një dite më parë lidhur me aktin e tij të ulët dhe çnjerëzor të pashembullt në historinë e shtetit shqiptar:  shkuljen e veshit dhe flokëve, goditjen e Diplomatit të ri shqiptar në sallën e Akademisë Politike në Vjenë duke diskretituar veten  para opinionit publik shqiptar  dhe diplomacisë botërore që ndodhet në kryeqytetin Austriak, duke dëmtuar imazhin e Shqipërisë në botë”.
Sipas tij, Rama si një i sëmurë psikik apo i droguar me overdozë që humbet kontrollin e vetes së tij, “Edi Rama në Tiranë pas kthimit nga Vjena mohoi se ka përdorur dhunën fizike ndaj diplomatit shqiptar, përkundrazi ngjarjen e paraqiti si një trillim që nuk ka ndodhur. Kurse dje në Vlorë Rama konfirmoi, vetë personalisht, të zezë mbi të bardhe, atë që kishte mohuar një ditë më parë ndonëse të gjithë shqiptarët besonin, se ishte më e pakta që ai kishte bërë në Vjenë në sallën e konferencave të Akademisë Politike ndaj diplomatit  Egin Ceka”.
Më pas ai vuri në dukje se në Vlorë në vend të faljes publike që i kërkoi familja Ceka të bënte Edi Rama ai ofroi të kundërtën.
“Edi Rama nga Vlora në një akt cinik që mund ta bëjnë vetëm  njerëz të verbuar nga urrejtja njerëzore  apo të sëmurë psikikë që mjekohen në spitale psikiatrike shpalli  në Twitter datën 24 prill si ditën e shkuljes së veshit, dhe në të njëjtën kohë duke pritur me një cinizëm mavi, se sa do ishin njerëzit që do pëlqenin propozimin e tij dhe të miqve të tij, që u munduan ta mbulojnë paturpësisht sulmin fizik që kreu  i opozitës shqiptare bëri publikisht në zemër të Europës”, theksoi ai.
Ndër të tjera, deputeti i PD Bogdani, nënvizoi se me këtë akt Edi Rama, jo thjesht goditi për herë të dyte diplomatin  dhe familjen e tij, por tentoi t’i shkulte veshët çdo qytetari të Republikës së Shqipërisë, që priste nga Rama një sqarim apo një falje publike.
“Me këtë postim ofendues dhe poshtërues për Egin Cekën dhe gjithë shqiptarët, ku shkuljet e veshit dhe flokëve nga Rama konsiderohen si diçka normale, që meritojnë dhe një ditë të veçantë nderimi,  Edi Rama, jo vetëm certifikoi aktin brutal  ndaj diplomatit, por i siguroi  shqiptarët se ai do të vazhdojë të sillet si i sëmurë psikik apo si rrugaç i mirëfilltë dhe do të dhunojë fizikisht në të ardhmen, madje akoma edhe më rëndë, këdo që do t’i dalë përpara, këdo që i bën pyetje që nuk i pëlqejnë, e që nuk e lënë atë të mbajë monologun e radhës”, vijoi ai.
Ndërkohë, sipas Bogdanit, Rama nuk kërkon falje dhe i thotë hapur shqiptarëve se do ta vazhdojë rrugën e dhunës, pasi ai më shumë se kushdo tjetër, e ka të qartë se sa më shumë afrohet data e zgjedhjeve atë aq më pak e mbajnë nervat. “Atë nuk e mbajnë nervat sepse ai më parë se të gjithë e di se do të humbasë më 23 qershor. Ankthi humbjes e detyron të mos kontrollojë veten e tij ose të përdorë doza që bëjnë të humbasë ekuilibrin psikik”, nënvizoi deputeti Bogdani.
Në fund të deklaratës për shtyp, përfaqësuesi i PD shpjegoi se ankthi i humbjes e detyron kreun e opozitës të ofendojë çdo shqiptar që kërkon t’i bëjë një pyetje të thjeshtë, çdo shqiptar që e sheh në sy. “Dhe ai sa më shumë afrohet 23 qershori, aq më shumë njerëz do godasë dhe aq më shumë veshë do të kërkojë të shkulë barbarisht, e aq më shumë do të vazhdojë të dëmtojë imazhin e Shqipërisë, siç ka bërë vazhdimisht. Në fakt ai ka ankthin më të madh nga të gjithë: ai ka ankthin se veshët do t’i shkulen përfundimisht më 23 qershor por dhe komisioni parlamentar do të zbardhë para shqiptarëve karakterin brutal të dhunshëm të aktit të tij në Vjenë”, përfundoi ai.