Reeker më 16 janar në Prishtinë

Zëvendësndihmës sekretari i Shteteve të Bashkuara të Amerikës, Philip Reeker, më 16 janar pritet që të vizitojë Kosovën.

Sipas mediave të cilat citojnë një burim nga qeveria kosovare, Reeker do ta vizitojë Kosovën, ndërsa më parë do të shkojë në Beograd, ku do të takohet me zyrtarët e lartë të këtij shteti për të biseduar për vazhdimin e dialogut.

“Në Kosovë do të takohet me krerët institucionalë të vendit, ndërsa më pas do të caktohet data e bisedimeve”, thotë ky burim.
“Serbia është duke i bërë presion Brukselit që Rezoluta 1244 të figuroj gjatë përfaqësimit rajonal të Kosovës, dhe për këtë arsye ende nuk është caktuar data finale e raundit të ri të bisedimeve. Ndërmjetësi i BE-së, Robert Cooper është duke bërë përpjekje që sa më shpejtë të caktohet një datë. Megjithatë, data nuk është caktuar ende, por pritet që në javën e tretë të vazhdojë dialogu teknik ndërmjet Kosovës dhe Serbisë”, citohet të ketë thënë ky burim.