Rexhepi:E bëjmë vetë hetimin për rrëmbimin e policëve

KFOR, vetëm nëse do, mund të jetë pjesë e hetimit lidhur me rrëmbimin e dy policëve të Kosovës nga ana e xhandarmërisë së Serbisë, ka deklaruar për “Tribuna Shqiptare”, ministri i Punëve të Brendshme të Kosovës, Bajram Rexhepi, pas deklaratës së Dan Harway, shef i zyrës për media në KFOR, sipas të cilit, hetimi dhe sqarimi i këtij incidenti, më shumë është çështje e autoriteteve të Kosovës dhe e misionit EULEX.

“Hetimin e bëjnë EULEX dhe Policia e Kosovës, por nëse ka nevojë edhe KFOR mund të hetojë, nëse duan ta mësojnë variantin e arrestimit të policëve”, ka thënë ministri Rexhepi, ai ka ritheksuar se kanë kërkuar që të bëhet hetimi i pavarur nga EULEX-i, KFOR-i dhe Komisioni Evropian për arrestimin e dy policëve.

Ndërkaq, Nicholas Hawton, zëdhënës i EULEX ka thënë se ata gjithmonë bashkëpunojnë me KFOR.

“EULEX-i po mbledh informata lidhur me rrethanat të asaj se çfarë ka ndodhur. Ne ende nuk kemi informata të sakta se ku ndodhi incidenti, por ne jemi duke punuar në këtë drejtim”, ka thënë Hawton.

Dy policët, Shukri Binaku dhe Sami Beqiri, të cilët u arrestuan të shtunën nga xhandarmeria serbe në zonën në afërsi të pikës kufitare në Merdarë, i janë dorëzuar të hënën EULEX-it.

(ar.si/BalkanWeb)