Rikthimi në Kuvend, Arvizu 90 minuta takim me Ramën

Pas një takimi me kreun e Partisë Socialiste Edi Rama, vetëm tre ditë para nisjes të sesioni të ri parlamentar, ambasadori amerikan Aleksandër Arvizu ka qenë i drejtpërdrejtë me qëndrimin e tij për pjesëmarrjen e opozitës në Kuvend, duke deklaruar se ky vendim do të bëjë të mundur plotësimin e reformave të rëndësishme për integrimin e Shqipërisë në Bashkimin Europian.
 

Ambasadori Arvizu, i cili mbërriti në selinë e PS-së, rreth orës 11.30, me ftesë të zotit Rama tha në një prononcim për mediat, se në takimin me dyer të mbyllura prej 90 minutash, kreu i PS-së, e kishte informuar për axhendën politike të opozitës në parlament. Ambasadori deklaroi se u diskutua gjerësisht për situatën politike dhe se ai kishte besim në hapat që do ndërmerren, por se gjërat nuk janë në dorën e tij.
 

“Ne patëm një disktuim shumë të ngrohtë, ai është shumë i hapur me mua rreth opinioneve të tij. Mendoj se vendimi i PS-së, është shumë konstruktiv. Parlamenti duhet të jetë forma kryesore për diskutimin e axhendës kombëtare, ligji, procesi ligjor, është vetëm një pjesë, implementimi i tij është gjithashtu i rëndësishëm. Unë mendoj se z.Rama do të përshkruajë vetë axhendën e tij legjislative, ky është vendimi i tij, as i imi as i komunitetit ndërkombëtar. Mendoj se ai është në favor të axhendës për reformat drejt integrimit”, u shpreh Arvizu.
 

Pas takimit, kreu i PS-së, Edi Rama nuk pati një propozim për mediat, por zyra e shtypit në selinë rozë informoi se në takim, kryetari Edi

Rama e njohu në detaje ambasadorin Arvizu me kursin e ri politik të saj si edhe me qëndrimin e Partisë Socialiste, lidhur me disa shqetësime me interes kombëtar e publik. Sipas njoftimit, bashkëbiseduesit ranë në një mendje jo vetëm për rëndësinë e kontributit të secilës palë që Parlamenti të funksionojë si duhet, por edhe për nevojën që ligjet të zbatohen dhe të mos mbeten vetëm në letër.