Rikualifikimi i hyrjes së Shkodrës, IKMT prish 6 objekte

TIRANË, 20 shtator /ATSH/ -Inspektorati Kombëtar i Mbrojtjes së Territorit, vijon me prishjen e objekteve për t’i hapur rrugë zbatimit të projektit “Rikualifikimi i Hyrjes të Qytetit Shkodër dhe Bregut Perëndimor të Liqenit të Shkodrës”.

IKMT bëri të ditur sot se, deri tani janë prishur 6 objekte.

Sipas IKMT-së, poseduesit e objekteve 1 dhe 2 katëshe janë treguar mirëkuptues dhe procesi i prishjes ka vijuar normalisht.

Projekti i ri për hyrjen e qytetit të Shkodrës, i financuar nga Fondi Shqiptar i Zhvillimit dhe mbështetur nga qeveria, synon transformimin e kësaj zone në një hapësirë multifunksionale dhe rekreative. Ky projekt përfshin krijimin e një parku prej 17-18 hektarësh, që do të përmbajë mjedise sportive, shëtitore për këmbësorë dhe biçikleta, pika panoramike për të shijuar pamjet e liqenit, si dhe hapësira për aktivitete dhe koncerte.

Pjesë e projektit janë edhe fushat e reja sportive dhe një mol i ri, që do të lidhet me mole të tjera në Shirokë dhe Zogaj.

1 nga 4