Roma hap ambulatorin social veterinar për familjet në vështirësi

ROMË, 11 shkurt/ATSH/ – Në Bashkinë I të Romës ka nisur zbatimin një projekt i ri social që synon të mbështesë personat në vështirësi ekonomike që kanë në kujdes kafshë shtëpiake. Autoritetet lokale kanë hapur një ambulator social veterinar, ku ofrohen kura bazë, vaksinime, kontroll mjekësor dhe këshillim sjellor për kafshët e shoqërisë.

Iniciativa, e miratuar ditët e fundit nga administrata e Bashkisë I të Romës, ka për qëllim të parandalojë braktisjen e kafshëve dhe t’u mundësojë familjeve në nevojë akses të sigurt në shërbime veterinare.

Shërbimi do të ndihmojë sidomos të moshuarit, personat me të ardhura të ulëta dhe familjet në situata të cenueshme, duke garantuar kujdesin minimal të nevojshëm për kafshët e tyre dhe njëkohësisht duke forcuar lidhjen sociale në komunitet.

Projekti shihet si një model i ri i veterinarisë sociale, që mund të zgjerohet edhe në zona të tjera të qytetit, në funksion të mbrojtjes së njerëzve dhe kafshëve.