Rusia bombardon vendin ku po ndaheshin pensionet, të paktën 21 të vrarë në Donetsk! Zelensky: Bota nuk duhet të heshtë
Të paktën 21 persona janë vrarë në një sulm ajror rus, në një fshat në Ukrainën lindore, thanë zyrtarët vendas ukrainas.
Viktimat ishin njerëz të zakonshëm, që po merrnin pensionet e tyre në vendbanimin Yarova të Donetskut, tha Presidenti Volodymr Zelensky.
Udhëheqësi rajonal i Donetskut, Vadym Filashkin, u shpreh se shërbimet e emergjencës ishin në vendngjarje dhe pati po aq të plagosur sa të vrarë, informon BBC.
Yarova është në veri të Slovyansk, një nga qytetet e mëdha në rajon, dhe jo shumë larg vijës së frontit, ndërsa forcat ruse përparojnë ngadalë në lindje.
Nëse konfirmohet, numri i të vdekurve do të jetë ndër sulmet më të rënda ndaj civilëve ukrainas në javët e fundit, 42 muaj pas pushtimit në shkallë të plotë të Rusisë.
Të paktën 23 persona u vranë në sulmet ajrore gjatë natës në kryeqytetin e Ukrainës, Kiev, në fund të gushtit.
Në fundjavë, Rusia nisi sulmin e saj më të madh ajror ndaj Kievit deri më tani, duke goditur ndërtesën kryesore qeveritare në kryeqytet, në atë që Zelensky e quajti një sulm “të pamëshirshëm” që synonte zgjatjen e luftës.
Duke postuar në internet pamje grafike të sulmit në Yarova, Zelensky tha se nuk kishte “fjalë” për të përshkruar sulmet e fundit ruse. Nuk pati asnjë reagim të menjëhershëm nga ushtria ruse.
Vadym Filashkin tha se sulmi ndodhi në orën 12:30 sipas orës lokale (09:30 GMT) të martën, ndërsa po shpërndaheshin pensionet. Ai postoi një fotografi nga vendi i ngjarjes që tregon një automjet të shërbimit postar ukrainas të dëmtuar rëndë, i tipit që përdoret për shpërndarjen e pensioneve.
Kreu i shërbimit Ukrposhta tha se automjeti ishte parkuar nën pemë si masë sigurie dhe një zyrtar postar lokal ishte plagosur në sulm.
“Ndoshta dikush i ka dhënë koordinatat”, spekuloi ai.
Shërbimi shtetëror i emergjencave i Ukrainës tha se tre persona të tjerë kishin vdekur në bombardimet e mëparshme ruse të vendbanimeve në Donetsk.
“Bota nuk duhet të heshtë”, tha Zelensky, duke kërkuar një përgjigje si nga SHBA-ja dhe Evropa, ashtu edhe nga grupi i kombeve G20.