Rusia dhe Ukraina gati për raundin e dytë të bisedimeve të paqes në Turqi

Zyrtarët rusë dhe ukrainas do të ulen këtë të hënë në qytetin turk të Stambollit për raundin e dytë të bisedimeve të drejtpërdrejta për paqe që nga viti 2022, por të dyja palët janë ende larg njëra-tjetrës se si t’i japin fund luftës dhe luftimet po përshkallëzohen.

Delegacioni rus mbërriti një ditë më parë në Stamboll, përpara bisedimeve të paqes me palën ukrainase të planifikuara për 2 qershor.

Bisedimet midis delegacioneve pritet të zhvillohen në Pallatin Ciragan në orën 13:00 sipas orës lokale (10:00 GMT), thanë burime nga Ministria e Jashtme turke.

Presidenti ukrainas Volodymyr Zelensky tha më herët se Ministri i Mbrojtjes Rustem Umerov do të udhëheqë delegacionin e vendit të tij në raundin e dytë të planifikuar të negociatave të drejtpërdrejta me Rusinë.

Raundi i parë i bisedimeve më 16 maj rezultoi në shkëmbimin më të madh të të burgosurve të luftës, por asnjë shenjë paqeje – apo edhe një armëpushimi, pasi të dyja palët thjesht paraqitën pozicionet e tyre fillestare negociuese.

Të dielën, Ukraina nisi një nga sulmet e saj më ambicioze të luftës, duke synuar bombarduesit rusë me rreze të gjatë veprimi të aftë për të transportuar armë bërthamore në Siberi dhe baza të tjera ushtarake, ndërsa Kremlini nisi 472 dronë drejt Ukrainës.

Ideja e bisedimeve të drejtpërdrejta u propozua për herë të parë nga Presidenti Vladimir Putin, pasi Ukraina dhe fuqitë evropiane kërkuan që ai të binte dakord për një armëpushim, të cilin Kremlini e hodhi poshtë.

Putin tha se Rusia do të hartojë një memorandum që përcakton konturet e përgjithshme të një marrëveshjeje të mundshme paqeje dhe vetëm atëherë do të diskutojë një armëpushim.

Kievi tha gjatë fundjavës se ishte ende në pritje të një draft-memorandumi nga pala ruse.

Medinsky, negociatori kryesor i Kremlinit, tha të dielën se Moska kishte marrë një draft-memorandum të Ukrainës dhe i tha agjencisë së lajmeve RIA të Rusisë se Kremlini do të reagonte ndaj tij të hënën.

Sipas të dërguarit të Trump, Keith Kellogg, të dy palët do të paraqesin në Turqi dokumentet e tyre përkatëse që përshkruajnë idetë e tyre për kushtet e paqes, megjithëse është e qartë se pas tre vitesh lufte, Moska dhe Kievi mbeten larg njëra-tjetrës.

/rtsh.al/