S’kam folur me Shqipërinë e Kosovën për shkëmbim territoresh

Ish kryeministri i Maqedonisë, Ljupço Georgievski, nuk ka diskutuar me asnjë zyrtar nga Shqipëria apo Kosova për shkëmbime territoresh por një gjë të tillë e ka bërë vetëm me ish kryeministrin e vrarë të Serbisë Zoran Gjinxhiq.

I pyetur nga "Lajm" se me cilët persona nga Shqipëria dhe Kosova ka diskutuar për shkëmbimin e territoreve, Georgievski u shpreh se me asnjë zyrtar nga këto shtete nuk ka folur rreth kësaj çështjeje.

"Për këmbimin e territoreve nuk kam biseduar me asnjë personalitet nga Shqipëria dhe Kosova. Ju e dini se në atë kohë Kosova ishte nën Serbi dhe bisedimet i kemi pas me ish kryeministrin e ndjerë të Serbisë", deklaroi ish kryeministri i Maqedonisë, Ljupço Georgievski.

Për shkak të atmosferës së krijuar ditëve të fundit, Georgievski nuk del personalisht në publik, prandaj dhe edhe intervistën për "Lajm" e dha nëpërmjet Shefit të tij të Kabinetit.

Para pak ditësh ish kryeministri maqedonas, Ljubço Georgievski ka zbuluar se ai dhe kryeministri serb, Zoran Gjinxhiq kanë diskutuar mbi shkëmbimin e territoreve ndërmjet Maqedonisë, Shqipërisë dhe Kosovës. Të gjitha detajet e bisedimeve për shkëmbim territoresh dhe ngjarje të tjera që kanë ndodh në atë kohë ai i ka shkruar në librin e tij autobiografik "Ky jam unë", që u promovua para pak kohësh në Shkup.

Sipas ish-kryeministrit maqedonas, gjatë këtij shkëmbimi do të duhej që Maqedonia të hiqte dorë nga Gostivari, Dibra dhe Tetova, ndërsa të merrte disa pjesë rreth Liqenit të Prespës.