SHBA: Fahri Balliu, sekseri i punëve të pista të Berishës

Kabllogrami i ambasadës amerikane, nënshkruar nga zv/ambasadori Kristina me titull Strategjia elektorale e Berishës tregon se si kryeministri gjashtë muaj para zgjedhjeve të qershorit 2009 po shpenzonte të gjitha paratë e buxhetit të shtetit në shërbim të fitores së zgjedhjeve. Sipas ambasadës, ai i trembej humbjes së zgjedhjeve për shkak të hetimeve që ishin të hapura dhe frikës se do të ndiqej penalisht ai apo anëtarë të familjes së tij. Dy ditë para se Zamir Shtylla të jepte dorëheqjen, (Drejtor i hetimeve për çështjen Basha në rrugën Rrëshen- Kalimash) Asistenti Politik e pa vëllain e Shtyllës duke ngrënë drekë me sekserin e punëve të pista të Kryeministrit Berisha, pronarin e gazetës së krahut të djathtë, Fahri Balliu. Më poshtë i plotë raporti i ambasadës.

Familja Berisha dhe Familja Balliu në një takim

Henris Balliu, një nga pronaret e kompanisë që ndërtoi fabrikën e Gërdecit, në zyrën e Sali Berishës

Përmbledhje: Edhe gjashtë muaj para se të shkojmë në zgjedhjet parlamentare, strategjia elektorale e Kryeministrit Berisha është duke u bërë më e qartë. Strategjia zgjedhore e Berishës duket, të paktën tani për tani, se do të fokusohet në tri shtylla – anti-komunizmi, shpenzimet e mëdha të qeverisë dhe mbyllja e hetimeve politikisht të ndjeshme që kërcënojnë të implikojnë anëtarë të rrethit të brendshëm të Berishës apo të familjes. Berisha mund ta përdorë kartën e anti-komunizmit në dy kahe, në ndërtimin e përkrahjes me zonat elektorale dhe të hedhë baltë në mënyrë selektive ndaj kundërshtarëve si bij të komunizmit. Së dyti, qeveria është e qartë se synon të harxhojë shuma të mëdha parash që tani dhe deri në zgjedhje në projekte të infrastrukturës së re dhe të rrisë pensionet e pagat. Së fundi, ashtu siç ka bërë prej muajsh, Berisha do të bëjë çdo gjë që është e mundur që të parandalojë vështirësitë e mëtejshme politike ose paditë për anëtarët e familjes së tij dhe rrethit të brendshëm, duke përdorur Ligjin e lustracionit për të trembur anëtarët e gjyqësorit dhe prokurorët.

Anti-komunizmi si një anti-korrupsion i ri:

Berisha u rikthye në pushtet në vitin 2005 me kartën e anti-korrupsionit. Pavarësisht nga disa suksese të mëdha në zbatimin e sistemeve që ndihmojnë në parandalimin e korrupsionit, të tilla si prokurimi online dhe iniciativa Kombëtare për Regjistrin e Bizneseve, perceptimi i publikut është se përpjekjet e Berishës ndaj korrupsionit kanë dështuar. Vëzhgimet e fundit kanë treguar se perceptimi publik në Shqipëri është se korrupsioni është më i keq se ai që ishte katër vjet më parë. Padia dhe gjyqi i afërt ndaj ministrit të Jashtëm Lulzim Basha për abuzim dhe shpërdorim detyre nga koha e tij si Ministër i Transportit, si dhe zbulimi i lidhjeve midis Bashës dhe vajzës së Berishës me biznesmenin-hije, boshnjakun Damir Fazliç, kanë ndikuar në këtë perceptim. Ndërkohë, Berisha po kërcënon me makinën e anti-komunizmit duke përdorur ligjin e lustracionit. Qëllimi real i këtij ligji është për të sfilitur disa prokurorë dhe gjyqtarë, por Berisha po e përshkruan ligjin si një përpjekje për drejtësi për ata shqiptarë që vuajtën nën komunizëm. Ashtu si kremi mbi tortë, fsheh qëllimin e vërtetë të ligjit të lustracionit, Berisha njoftoi gjithashtu javën e kaluar për krijimin e një instituti për studimin e krimeve të komunizmit, si dhe planet për të ndërtuar një obelisk masiv për të  përkujtuar viktimat e komunizmit. Berisha vetë ishte një funksionar i lartë i Partisë Komuniste dhe shërbyer si mjeku personal për Enver Hoxhën, por kjo nuk e ka ndalur Berishën të hedhë baltë mbi të tjerët, që nga kreu i opozitës Edi Rama, me dyshimin për prirjet e tyre pro-komuniste.

Një buxhet elektoral:

Berisha ka bërë të qartë për muaj se shqetësimi i vetëm fiskal dhe ekonomik për qeverinë në gjashtë muajt e ardhshëm është rizgjedhja. Kur po i kërkonte FMN-së që të largohej, Berisha pranoi sinqerisht që ai donte që FMN të ishte jashtë në mënyrë që ai mund të ndjekë “një buxhet elektoral”, para se të shtonte se FMN-ja do të jetë e mirëpritur për t’u kthyer pas zgjedhjeve. Një njeri i brendshëm i Partisë Demokratike i tha Ambasadës se Shqipëria do të jetë e mbrojtur nga çdo krizë financiare globale deri pas zgjedhjeve të qershorit për shkak të shumave të mëdha të parave që qeveria ka në plan të shpenzojë që tani e deri në zgjedhje me projektet e infrastrukturës, pensionet dhe pagat në rritje, – një bujari që do të përfundojë menjëherë pas zgjedhjeve. Berisha është gjithashtu i dëshpëruar për të shmangur çdo perceptim të publikut që ekonomia shqiptare mund të jetë ngadalësuar. Berisha publikisht insiston se ekonomia shqiptare po rritet me 9.9 për qind,edhe pse FMN-ja dhe Ministri i Financave i Berishës kanë përsëritur publikisht parashikimet për 4-6 për qind rritje.

Mbyllja e hetimeve të rëndësishme:

Kryeministri Berisha është qartësisht i dëshpëruar për të ndaluar çdo ndikim nga Gërdeci e në vazhdim, Durrës-Kukës, Damir Fazliç dhe hetime të tjera që kërcënojnë të implikojnë anëtarë të familjes së Berishës apo të rrethit të brendshëm. Burime të shumta i kanë thënë Ambasadës se synimi i vetëm e Berishës për kalimin e detyruar të Ligjit të dosjeve është vënia nën presion i prokurorëve dhe gjyqtarëve me shpresën që të ndikojë në hetimet në vazhdim. Që nga kalimi i Ligjit më 14 janar, Zamir Shtylla, prokurori i përfshirë në hetimin e Gërdecit, ka dhënë dorëheqjen, duke cituar dëshirën për të mos politizuar më tej Zyrën e Prokurorit të Përgjithshëm. Edhe pse kjo mund të jetë vetëm një rastësi, dy ditë para se Shtylla të jepte dorëheqjen, Asistenti Politik e pa vëllain e Shtyllës duke ngrënë drekë me sekserin e punëve të pista të Kryeministrit Berisha, pronarin e gazetës së krahut të djathtë, Fahri Balliu.

Koment: Drejt falimentimit

Kalimi i Ligjit të lustracionit pavarësisht kundërshtimit të fortë të publikut, OSBE-së, SHBA dhe Këshillit të Evropës dhe mosmarrja parasysh e paralajmërimeve për ekonominë duke zbuar FMN -në janë shenja të qarta të rrugës që ka zgjedhur Kryeministri Berisha javët e fundit, dhe të gjitha për hir të fitimit zgjedhjeve të ardhshme. Interesat në këto zgjedhje janë të larta, Berisha frikësohet se ai ose anëtarët e familjes së tij mund të përballen me ndjekjen penale me një qeveri socialiste, që do të thotë se Berisha do të sakrifikojë gjithçka të të siguruar një fitore.