SHBA, Rusi, bisedime për kontrollin e armatimeve

Një zyrtar i lartë rus tha se mes Rusisë dhe Shteteve të Bashkuara mbeten mosmarrëveshje serioze edhe pas raundit më të fundit të bisedimeve për kontrollin e armatimeve mes dy vendeve.

Zëvendës-ministri i Jashtëm i Rusisë, Sergei Riabkov, tha se të dy vendet nuk arritën t'i afronin qendrimet e tyre për çështjet lidhur me kontrollin e armatimeve, por vuri në dukje se Moska është e kënaqur me bisedimet.

I ngarkuari me funksionin e nënsekretarit amerikan të Shtetit, Xhon Rod, kryeson delegacionin e Shteteve të Bashkuara në bisedimet e sotme në Moskë, që besohet se janë diskutimet e fundit për këtë temë, para se administrata e re amerikane të fillojë punën më 20 janar.

Në rendin e ditës së bisedimeve u përfshinë planet amerikane për sistemin mbrojtës nga raketat dhe një marrëveshje për paksimin e armëve bërthamore që skadon këtë vit.

Në komentet e tij, zoti Riabkov u shpreh me optimizëm për mundësinë e arritjes së një marrëveshjeve për zëvendësimin e Traktatit për Pakësimin e Armëve Strategjike, që skadon në dhjetor të vitit 2009.