SHBA kundër mos certifikimit të listës serbe – Reagon edhe BE e OSBE, Krasniqi: Serbët bllokuan votimin e diasporës

Ambasada e Shteteve të Bashkuara në Prishtinë ka kritikuar përpjekjet e Vetëvendosjes për të bllokuar certifikimin e Listës Serbe, duke i quajtur ato veprime të ngushta dhe përçarëse. Sipas saj, çdo qytetar i Kosovës duhet të ketë mundësi të ushtrojë të drejtat demokratike, përndryshe, siç thuhet në deklaratë, “minohen stabiliteti i vendit dhe interesat e SHBA-së”.

Ky reagim erdhi menjëherë pas vendimit të Komisionit Qendror të Zgjedhjeve, i cili miratoi 22 nga 24 subjektet politike që kërkuan pjesëmarrje në zgjedhjet e 28 dhjetorit, duke përjashtuar NISMËN dhe Listën Serbe.

Mos certifikimi i Listës Serbe shkaktoi reagime të forta edhe nga OSBE-ja, e cila e quajti vendimin “devijim të qartë nga standardet ndërkombëtare”, si dhe nga Zyra e BE-së dhe ambasadori britanik Jonathan Hargreaves. Në vijim të debatit, anëtari i Vetëvendosjes në KQZ, Alban Krasniqi, tha se shqetësimi real nuk është certifikimi, por “ngufatja e pjesëmarrjes politike të serbëve nga vetë Lista Serbe”.

Ai akuzoi këtë subjekt për lidhje me veprime kriminale dhe për përdorimin e fondeve të ardhura nga Beogradi për qëllime të dyshimta. Krasniqi kritikoi edhe heshtjen e diplomatëve perëndimorë për bllokimin që, sipas tij, opozita dhe Lista Serbe po i bëjnë të drejtës së diasporës për të votuar. Ai theksoi se ky bllokim rrezikon procesin zgjedhor dhe dëmton demokracinë në vend.

Sipas tij, komuniteti ndërkombëtar duhet të vëzhgojë me kujdes çfarë po ndodh në skenën politike të Kosovës. Krasniqi kërkoi që çdo përpjekje për ndikim të jashtëm të trajtohet me seriozitet. Ai nënvizoi se mbrojtja e të drejtave demokratike është thelbësore për një proces të ndershëm zgjedhor.

Gazetar: A. Mata

/rtsh.al/