STOKHOLM – Suedia ndalon përdorimin e telefonave celularë në shkolla

STOKHOLM, 16 shtator /ATSH/ – Nga vjeshta e vitit 2026, të gjitha shkollat ​​në nivel kombëtar  duhet të mbledhin dhe të mbajnë telefonat e nxënësve deri në fund të ditës, sipas “The Guardian”.

Ky veprim është një  përpjekje për të përmirësuar sigurinë dhe kushtet e studimit për nxënësit.

Nga viti i ardhshëm shkollor, duke filluar nga vjeshta e vitit 2026, do të jetë e detyrueshme për të gjitha shkollat ​​të mbledhin telefonat e nxënësve dhe t’i mbajnë ato deri në fund të ditës.

Rregulli i ri, i cili do të prekë fëmijët midis moshës 7 dhe 16 vjeç, është pjesë e një pakete masash të propozuara të shpallura sot nga qeveria.

“Ajo që po paraqesim sot është një investim historik buxhetor në shkolla dhe axhenda më e madhe e reformave në më shumë se 30 vjet”, tha ministrja e re e arsimit dhe shkollave e Suedisë, Simona Mohamsson.

Projektligji i buxhetit, të cilin qeveria do ta paraqesë javën tjetër, ndan 95 milionë korona për vitin 2026 dhe 100 milionë korona vitin pasardhës për të zbatuar ndalimin e telefonave.

Shumica e shkollave në Suedi tashmë grumbullojnë telefonat celularë në fillim të ditës shkollore, por nxënësit kanë gjetur mënyra për ta anashkaluar ndalimin, siç është dorëzimi i një telefoni të rremë ose thënia se e kanë harruar telefonin e tyre ose se është i prishur.

“Kjo duhet të zbatohet për të gjithë në të gjitha klasat e Suedisë. Vlen për çdo të ri në Suedi dhe nuk është opsionale”, ka thënë më parë Mohamsson, e cila është kreu i partisë liberale, për ndalimin.

Në fillim të këtë vit, Danimarka tha se do të ndalonte telefonat celularë në shkolla me rekomandimin e një komisioni qeveritar që gjithashtu vendosi se fëmijët nën 13 vjeç nuk duhet të kenë smartfonin ose tabletin e tyre.

Vitin e kaluar, Norvegjia  njoftoi një moshë minimale prej 15 vjeç për përdorimin e mediave sociale, pasi qeveria akuzoi kompanitë e teknologjisë se po “përballeshin me trurin e fëmijëve të vegjël”.

Ndërkohë, Franca e shtrëngoi ndalimin e saj të telefonave celularë në shkollat ​​e mesme në shtator. /Ad.Ab./