Saimir Demi nderohet pas vdekjes me çmimin “Ismet Bellova”, gazetari Methasani: La një boshllëk të madh

Gazetari i mirënjohur Saimir Demi është nderuar pas vdekjes me çmimin prestigjioz “Ismet Bellova”, si vlerësim për kontributin e tij të jashtëzakonshëm në gazetarinë sportive dhe televizive.

I ftuar në emisionin “Në Kohë Reale”, me moderimin e Flori Gjinit, gazetari Dëfrim Methasani ndau emocione dhe kujtime të forta për kolegun dhe mikun e tij të ndjerë.

“Ende nuk e besojmë që nuk e kemi më mes nesh. Iku shpejt, por la pas një arkivë të jashtëzakonshme dhe një punë të mrekullueshme, si në gazetarinë e shkruar ashtu edhe në atë televizive. La një boshllëk të madh, si në familje, ashtu edhe në redaksi, duke lënë shumë punë të tjera pa përfunduar. Ishte pikërisht në kulmin e tij profesional”, u shpreh Methasani.

Gazetari Methasani solli në vëmendje se të dy gazetarët kishin nisur së bashku ciklin “Kam lindur kuqezi”, një projekt i frymëzuar nga suksesi i Kombëtares shqiptare.

“Së bashku kishim nisur një cikël emisionesh “Kam lindur kuqezi”, të cilin donim ta vazhdonim, pasi suksesi i Kombëtares na kishte frymëzuar jo vetëm si gazetarë, por edhe si njerëz e si shqiptarë, sepse për të gjithë ne ishte një krenari. Kishim planifikuar edhe një udhëtim në vendlindjen e Berat Gjimshiti, në Luginën e Preshevës, për të realizuar një reportazh me familjen e tij. Saimiri kishte një dëshirë të madhe t’i takonte njerëzit nga afër, t’i sillte në ekran, të tregonte historitë e atyre që kanë bërë histori”, shtoi ai.

Kryeredaktori i lajmeve në redaksinë e Sportit në Radio Televizionin Shqiptar, ndërroi jetë pas një beteje të gjatë me sëmundjen, në moshën 57-vjeçare.

/rtsh.al/