Sarkozy ka pranuar 60 milion euro nga Gaddafi

Presidenti i Francës, Nicolas Sarkozy, mori 60 milionë euro nga koloneli Gaddafi, për t’i përdorur gjatë fushatës zgjedhore kur fitoi mandatin në krye të “Elysse”, në vitin 2007.

Prova të reja të bëra publike në Paris tregojnë se ish-diktatori libian, i vrarë nga kryengritësit e mbështetur nga perëndimi në tetor të vitit 2011, ishte një prej financuesve kryesorë të atij që u shndërrua në një prej kritikëve më të vendosur të regjimit të tij në Libi, gjatë trazirave të vitit të shkuar.

Një dokument shtetëror, i publikuar nga “Mediapart”, një faqe e respektuar e gazetarisë hulumtuese në Francë, flet për vizita të shumta të Sarkozy dhe personelit të tij në Libi, me qëllim sigurimin e fondeve për fushatën.

Një prej dokumenteve të publikuar, nën inicialet NS (Nicolas Sarkozy) me datë 6 tetor 2005, i referohet qartësisht Gaddafit, kur shkruan se “me ndihmën e dhënë prej kolonelit zgjidhim tërësisht nevojat tona financiare për fushatën”.

Në atë kohë, Sarkozy ishte një ministër i Brendshëm gjithmonë e më popullor, për fushatën e tij të vendosur kundër emigrantëve të jashtëligjshëm.

Nëse ato që publikohen në këtë dokument janë të vërteta, atëherë Sarkozy duhet të përgjigjet për shkeljen flagrante të ligjeve mbi financimet e partive politike dhe fushatave zgjedhore.