Sejdiut i lëkundet karrigia

Kandidati për titull të kampionit, Trepça ’89 qe tri xhiro nuk ka shënuar fitore. Në tri ndeshjet e fundit skuadra mitrovicase i ka fituar vetëm tri pikë, pasi në të tria ato takime ka luajtur baras.

Barazimin e fundit ‘Xehetarët’ e regjistruan të dielën si mysafirë të Gjilanit (0:0), derisa në dy ndeshjet e mëparshme ata e kishin fituar vetëm nga një pikë në duele me Dritën e Besën.

Këto rezultate nuk po i kënaqin mitrovicasit, të cilët dëshirojnë që sivjet të stolisen me titull të kampionit. Andaj, Gani Sejdiut ka nisur t’i lëkundet karrigia e shefit të shtabit teknik.

Mirëpo, burimet e gazetës Express brenda këtij klubi kanë bërë të ditur se të hënën do të kuptohet nëse Sejdiu do të vazhdojë apo jo ta kryejë detyrën e trajnerit, pas një takimi që do ta zhvillojë ai me anëtarët e Kryesisë së Trepçës ’89.

Minatorët aktualisht pozicionohen në vendin e katër të renditjes tabelore me 25 pikë të tubuara, pesë më pak sesa lideri Prishtina. Prej pesëmbëdhjetë ndeshjeve të zhvilluara, Trepça ’89 i ka shënuar gjashtë fitore, ndërsa i ka pësuar dy humbje. Mirëpo, në shtatë takime të tjera ka luajtur baras.