Serbët bllokojnë sërish EULEX-in, KFOR-i kundërpërgjigjet

Pas pesë orësh, ushtarët e KFOR-it kanë zhbllokuar rrugën në fshatin Jagnjenicë ku kishin ndaluar komunikacionin midis Zubin Potokut dhe Mitrovicës, si reagim ndaj pengimit që strukturat ilegale në veri të vendit, të cilat kanë penguar lëvizjen e lirë të EULEX-it në atë pjesë të vendit.

(E Plotësuar) KFOR-i rreth orës 9:00 të ditës së sotme ka bllokuar lëvizjen në pikën e tyre të kontrollit në Jagnjenicë, pasi serbët në fshatin fqinjë Zhupçë kanë ndaluar veturat e EULEX-it të cilat po udhëtonin drejt vendkalimit kufitar në Bërnjak.

Lëvizja në këtë rrugë është normalizuar pas marrëveshjes së arritur midis përfaqësuesve të KFOR-it dhe atyre të serbëve lokal, të cilët, sipas mediave serbe, janë pajtuar që të respektojnë marrëveshjet e mëhershme që në drejtim të Bërnjakut të lëvizin tri vetura të EULEX-it nën përcjelljen e KFOR-it.

Sot ishte hera e pestë që vetëm brenda pak ditëve, strukturat ilegale në veri të Kosovës, kanë penguar lëvizjen e veturave të EULEX-it.

Serbët bllokojnë sërish EULEX-in

Disa automjet të EULEX-it janë penguar mbrëmë në vendin e quajtur Dolani, në komunën e Zveçanit nga serbët e dirigjuar nga strukturat ilegale që të vazhdonin rrugën e tyre kah vendkalimi kufitar në Jarinje.

Automjetet e EULEX-it, pas një qëndrimi të shkurtër, janë kthyer prapa dhe nën përcjelljen e policisë së Kosovës kanë shkuar për në drejtim të Zubin Potokut, përkatësisht në fshatin Jagnjenicë, raportojnë mediat serbe.

Sipas tyre, përfaqësuesit e Kuvendit të komunës së Zveçanit theksojnë se me përfaqësuesit e KFOR-it dhe të EULEX-it kanë arritur të shtunën një marrëveshje me të cilën parashihet që deri të mërkurën e ardhshme të lejon nga tri automjete me kushtin që në to të ketë vetëm përfaqësues të Misionit të BE-së në Kosovë dhe të mos vozisin doganierët e Kosovës.

Serbët theksojnë se janë marrë vesh që mund të kalojnë nga tre “Xhipa” në ditë, dhe jo më shumë, në mënyrë që EULEX të mund të arrijë deri në pikën e fundit të veriut nëpërmjet rrugëve.