Serverat e institucioneve shtetërore që secin me hapin e kohës

Nga Altin Ketro

U bënë disa vite që marrëdhëniet e biznesit me disa nga institucionet e shtetit zhvillohen nëpërmjet shërbimit elektronik. Përpos shumë të mirave që vijnë nga mos kontakti i drejtpërdrejtë i individit me nëpunësit që në shumë raste krijonte edhe marrëdhënie korruptive, ka ulur edhe shpenzimin e kohës që duhet të harxhoje për të shkuar e për të dorëzuar një dokument të caktuar. Deri këtu gjithçka në rregull. Por vihet re se po këto institucione nuk po ecin me hapin e kohës. Që do të thotë se teknologjia avancon, kurse serverat e tyre kanë mbetur në vendnumëro.

Rasti që dua të trajtoj ka të bëjë me marrëdhëniet e biznesit me Drejtorinë e Përgjithshme të Tatimeve dhe specifikisht me deklarimet elektronike online. Ata që merren me biznes apo i lidh puna me to, e kuptojnë shumë mirë problemin që dua të ngre. Çdo muaj biznesi, kryesisht ai i Madh dhe VIP, deklaron një sërë formularësh tip të cilët i plotëson sipas nivelit të ecurisë që ka patur. Të tilla janë deklarata e TVSH-së, e Sigurimeve, dhe e TAP-it. Përpos këtyre janë edhe deklarimi i librave të Shitjes dhe të Blerjes (në formatin excel) si dhe listëpagesat. Përveç librave, gjithë formularët e tjerë biznesi mund ti ngarkojë e dërgojë me çdo lloj brouseri: Explorer (i vjetër), Mozilla, Chrome etj. Kur vjen puna tek dërgimi i librave, duhet përdorur vetëm Internet Explorer. Dhe pikërisht Explorer-i në versionet 6 dhe 7. Kjo, pasi versionet e fundit, 8 dhe 9, nuk janë të përshtatshëm për serverat e D.P.Tatimeve.

Problemi lind se Explorer 6 dhe 7 është funksional vetëm në paketën Windows XP, kurse paketa Windows 7 nuk i pranon këto versione explorer-i pasi i konsideron të vjetra për sistemin e saj operativ.

Po çndodh?! Të gjitha ata që kanë blerë PC apo laptop dhe kanë të instaluar paketën Windows 7 (me liçensë apo të piratuar), kur u duhet që ta përdorin kompjuterin për nevoja pune të cilat lidhen me ngarkimin (uploading) e dokumentacionit për Drejtorinë e Tatimeve, u duhet që të heqin dorë prej kësaj pakete dhe ta riformatojnë kompjuterin me paketën XP që ta bëjnë funksionale e ti shërbejë për punën e tyre.

Secili është i lirë të zgjedhë versionin e tij të sistemit operativ; ka që janë të fiksuar te XP, ka të tjerë që duan programet më të fundit, pra Windows 7. Por, nuk është aspak e drejtë që për hir të një kleçke që lind nga neglizhenca, paaftësia … e institucioneve, biznesi apo individi të heqin dorë prej një programi të caktuar vetëm e vetëm sepse serverat e D.P.Tatimeve nuk ecin edhe ato me hapin e kohës.

Por nuk janë vetëm ata që kanë marrëdhënie me tatimet që hasin këtë problem. Janë edhe bizneset që aplikojnë te Agjencia e Prokurimit Publik, të cilët u duhet të ngarkojnë dokumentacionin për tenderat publikë, që janë të detyruar të punojnë vetëm me sistemin Windows XP, që të kenë të aksesueshëm brouserin Internet Explorer versionet 6 dhe 7, përndryshe dosjet nuk ngarkohen kurse të mëparshmet dalin të padukshme.

Duke u nisur nga ky handikap, do i kërkoja drejtueseve të këtyre dy institucioneve shumë të rëndësishme, që të nxisin inxhinierët e tyre elektronikë që ti përshtasin serverat për të pranuar ngarkim dokumentesh: Excel, Word, PDF, edhe nga versionet Explorer 8 apo 9. Kjo do i vinte në ndihmë veçanërisht atyre që u duhet të heqin dorë përdhunshëm nga paketa Windows 7, paketë të cilën e kanë të blerë sipas rregullave të mbrojtjes së të drejtës së autorit. Një thirrje kjo që shpresoj të mos bjerë në vesh të shurdhër apo të kalojë në kalendat greke…