Shkarkohet "pushtuesi" i Greqisë

DEVOLL - Nëse drejtori i Përgjithshëm i Policisë së Shtetit, kryekomisar Ahmet Prençi nuk do të kishte kërkuar përmes telefonit një komunikim me shefin e bluve të Devollit, Artan Braholli, ai nuk do të ishte shkarkuar nga detyra. Mësohet se, për shkak se Braholli kishte hyrë në shtetin fqinj si “klandestin” për disa orë në shtetin fqinj, ndërsa mbante veshur uniformën e detyrës, pa lajmëruar më parë Ministrinë e Brendshme, ai mund të rrezikojë edhe burgun, për shkak të shkeljes me dashje të normave të detyrës. Të hysh me uniformë ushtarake në një shtet të huaj pa leje të posaçme, konsiderohet si agresion. Sipas të dhënave, bëhet e ditur se pas ngjarjes që ndodhi të shtunën në datë 5 prill, dje kreu i Policisë së Shtetit, Ahmet Prençi, firmosi lirimin nga detyra të 40-vjeçarit Braholli. Ky i fundit kishte hyrë 6 km në territorin grek, duke përdorur autoritetin e një drejtuesi të lartë policie tek homologët grekë. Madje, dyshohet që ai të ketë qenë më në thellësi të këtij territori, jo deri tek “Free Shop”, siç ai ka deklaruar, ndërsa dyshohet që destinacioni i tij ka qenë qyteti grek i Kosturit. I liruari nga detyra ka rrëfyer para eprorëve të tij, se ka hyrë në doganën greke të Kapshticës duke iu marrë leje dhe autoriteteve, për të bërë pazar tek “Free Shop”-i në anën greke. Sipas një vendimi të veçantë të Ministrisë së Brendshme, njerëzit me uniformën e Policisë së Shtetit edhe në rastet kur shkojnë me pushime apo për vizita të ndryshme, duhet të të marrin miratimin me shkrim nga drejtori i Përgjithshëm dhe për nivele shefash komisariatesh dhe drejtorë policie këtë miratim e jep ministri i këtij dikasteri.

Ngjarja

Sipas të njëjtave burime, bëhet me dije se Ahmet Prençi ka komunikuar me telefon në mënyrë të drejtpërdrejtë me të gjithë shefat e komisariateve në vend gjatë ditës së shtunë, për të parë gatishmërinë në punë, pas ngjarjes së rëndë të ndodhur në burgun e Burrelit, nga ku u arratisen për gati 40 minuta, 2 të dënuar. I vetmi që rezultoi me dy telefona që ka në posedim të fikur, ishte kreu i Komisariatit të Devollit, Braholli. Pasi ka kërkuar informacion për ish-shefin në fjalë, që të thërritet në radio në mënyrë urgjente, për të komunikuar me të personalisht, askush nuk mundi ta gjejë Brahollin, ndërsa nga vartësit e tij është dhënë informacioni se ai gjendej në vendkalimin kufitar të Kapshticës. Misteri u zbulua nga agjentët e Shërbimit të Kontrollit të Brendshëm, të cilët mësuan se drejtuesi i lartë ka thyer disiplinën dhe ka shkelur rregullat e shërbimit, duke hyrë rreth orës 18 në territorin e një shteti të huaj me uniformë policie dhe pa njoftuar krerët më të lartë të Ministrisë së Brendshme. Pas kësaj nisën hetimet, ndërsa informacioni i detajuar mbërriti pranë drejtorit të Përgjithshëm, Prençi, madje dhe pranë ministrit Nishani. Sipas Brahollit, “qëndrimi në tokën fqinje ishte i shkurtër”, ndonëse rezulton që ai të ketë hyrë më në thellësi të saj. Dyshohet që destinacioni i tij ka qenë Kosturi, ndërsa ai ka shfrytëzuar njohjen me policët grekë. Ky duket se është dhe precedenti i parë i këtij lloji, ndërkohë që çështja duket se do të ketë një hetim të posaçëm të SHKB-së, në ndihmë të së cilës do të vihet edhe kasetat e kamerave të instaluara në Kapshticë.