Shkencëtarët kishin paralajmëruar se nuk duhej kaluar, Korriku arrin pragun kritik të ngrohjes globale

Muajin e kaluar, bota u përball me një provë të qartë se si do të jetë vera me 1.5 gradë të ngrohjes globale, një prag që shkencëtarët paralajmërojnë se planeti nuk duhet ta kalojë, por tashmë duket se nuk është më i mundur të arrihet.

Temperatura mesatare globale në korrik, muaji më i nxehtë i regjistruar deri më tani, ishte rreth 1.5 gradë Celsius më i ngrohtë se epoka para-industriale, njoftoi të martën Shërbimi për Ndryshimet Klimatike të Bashkimit Evropian, Copernicus.

Njoftimi erdhi pas një sërë valësh vdekjeprurëse të të nxehtit dhe temperaturave të jashtëzakonshme rekord në disa kontinente, si dhe nxehtësisë së paprecedentë të oqeanit në të gjithë globin.

Shkencëtarët e Copernicus thonë se është muaji i parë i verës që ka tejkaluar 1.5 gradë, duke ofruar një demonstrim të shkurtër të verës së ardhshme.

Pragu 1.5 gradë është i rëndësishëm sepse shkencëtarët e konsiderojnë atë një pikë kyçe për planetin, përtej së cilës shanset e nxehtësisë ekstreme, përmbytjeve, thatësirës, ​​zjarreve dhe mungesës së ushqimit dhe ujit do të bëhen edhe më të pafavorshme për jetën siç e njohim ne.

Është qëllimi që shkencëtarët vendosën në Marrëveshjen historike të Parisit të 2015-ës për të minimizuar dëmin e krizës klimatike.

Shkencëtarët janë veçanërisht të shqetësuar se temperatura globale do të qëndrojë mbi 1.5 gradë për një afat të gjatë. Deri në vitin 2022, bota ishte ngrohur rreth 1.2 gradë.

“Ndërsa thyerja e pragut prej 1.5 gradë Celsius për një ditë ose një javë ose një muaj nuk është e njëjtë me thyerjen e tij për mesataren afatgjatë, është e rëndësishme të monitorohet se sa shpesh dhe për sa kohë e tejkalojmë këtë prag. Ndërsa temperaturat vazhdojnë të rriten, efektet do të vazhdojnë të bëhen më serioze”, tha Rebecca Emerton, shkencëtare me Copernicus.

Vitet e fundit e kanë bërë plotësisht të qartë se bota tashmë po ndjen efekte alarmante të krizës klimatike, për të cilën shumë nuk janë të përgatitur. Nëse planeti vazhdon të nxehet, Emerton tha se bota do të përballet me mot edhe më ekstrem sesa ai që ka përjetuar tashmë një pjesë e madhe e planetit.

“Ne kemi parë ndikimet që këto lloj ngjarjesh kanë tashmë tek njerëzit dhe në planetin tonë, dhe kështu çdo pjesë e vogël e një shkalle ngrohjeje është e rëndësishme“, tha Emerton.

Shkencëtari kryesor i Berkeley Earth, një organizatë jofitimprurëse e të dhënave mjedisore, Robert Rohde tha se tejkalimi i 1.5 gradë Celsius në korrik është hera e parë që ky prag është kapërcyer ndonjëherë gjatë verës në hemisferën veriore, gjë që e bën këtë një moment kritik për planetin.

“Ndërsa dimrat e kaluar jashtëzakonisht të ngrohtë janë të dukshëm, vëzhgimi i nxehtësisë ekstreme në verë ka të ngjarë të ketë ndikime më të mëdha të drejtpërdrejta në jetën e njerëzve. Shtimi i 1.5 gradë Celsius në dimër e bën një dimër të butë, por gjatë verës mund të shkaktojë ekstreme të paprecedentë”, tha Rohde.

Shkencëtarët e Copernicus vunë në dukje se ndërsa El Niño vazhdon të zhvillohet, bota mund të dëshmojë më shumë nga këto shkelje të paprecedenta të temperaturës.

“Edhe nëse kriza klimatike nuk përshpejtohet, por vazhdon në trajektoren e saj aktuale, ne do të shohim më shumë ditë, javë, muaj dhe vite me temperatura rekord, dhe ndikime të tjera në sistemin tonë të Tokës. Ne duhet të bëjmë gjithçka që mundemi për të reduktuar emetimet dhe për të kufizuar ngrohjen e planetit”, tha Emerton./ CNN

/rtsh.al/