Shkodra ende nën ujë, evakuohen 527 familje

Për këtë arsye, ministri i Brendshëm Lulzim Basha ndodhet që në orët e para të mëngjesit të sotëm në zonat e përfshira nga përmbytjet.Ministri Basha, ka zhvilluar edhe një mbledhje me Komisionin e Emergjencave Civile të Qarkut Shkodër. Situata në njësitë vendore të Shkodrës, në të cilat është shpallur gjendja e emergjencës, sipas vlerësimeve të bëra nga Drejtoria e Bujqësisë dhe njësive vendore Shkodër, janë përmbytur rreth 4786 ha tokë. Janë në prezencën e ujit 870 shtëpi. Të evakuuar gjithsej janë 527 familje, ndërsa ende vazhdojnë evakuimet. Këto të dhëna janë të orës 08:00 të mëngjesit të sotëm.Evakuimi vazhdon. Pritet të evakuohen gjithsej rreth 3000 persona nga njësitë vendore të bashkisë Shkodër, Komunat Ana e Malit, Dajç, Bërdicë, Bushat. Në komunën Dajç, një grup pune i ngritur nga Prefekti në bashkëpunim me strukturat e ushtrisë është punuar dhe riparuar rreth 140 m argjinature dhe brenda ditës së sotme pritet të përfundoje pjesa tjetër e dëmtuar prej 400 m. Gjithashtu për të ndihmuar në situaten e krijuar, kanë ardhur edhe një grup specialistësh nga Kosova i përbërë prej 15 vetësh të cilët janë të pajisur me mjete speciale, varka gome etj, që do të vihen në dispozicion të zonave që janë të përmbytura.