Shkolla e Baletit, turne në Itali

Pas një turneu të suksesshëm në Ankara dhe Stamboll të Turqisë, trupa e ansamblit të Shkollës së Baletit ka udhëtuar drejt Italisë. Trupa e kësaj shkolle merr pjesë në një festival ndërkombëtar, i cili u shfaq drejtpërsëdrejti me lidhje satelitore në shumë vende të botës. Programi i përzgjedhur nga drejtoresha e shkollës dhe koreografja Blerina Arbana për këtë aktivitet, përfshinte tri zhanre të ndryshëm: klasik, bashkëkohor dhe folk, në një interpretim që zgjati rreth 2 orë e gjysmë. "Piazza di Cavallo" ishte vendi që hapi festivalin, ku publiku vendas duartrokiti interpretimet e realizuara nga artistët shqiptarë. Më shumë vëmendjen e tërhoqën vallet folklorike, veçanërisht "Festë të madhe ka sot Shqipëria". Kjo valle, e cila shfaq traditat shqiptare në momente festash, u cilësua si një ndër performancat më të bukura të të gjitha valleve folkloristike pjesëmarrëse. Vendi i radhës i interpretimit ishte Salso Maggiore, këtë radhë në baletin klasik dhe bashkëkohor. Ndërkohë, ky tur shfaqjesh do të prekë qytete të tjera të Italisë si Lago Maggiore, Parma, Milano.