Shoq. e Ricikluesve te Shqipërisë: Të aplikohet menaxhimi i integruar

Shoqata e Ricikluesve te Shqipërisë ka reaguar sot lidhur me situatën ku ndodhet Industria e Riciklimit në vendin tonë dhe problematikën me lejet e importit. Në një deklaratë për mediat Shoqata e Ricikluesve te Shqipërisë shpreh mbështetjen e plotë ndaj investimeve të huaja në fushën e riciklimit në vendin tone, duke kërkuar nga klasa politike të inkurajojë investimet e huaja në Shqipëri dhe të konsiderojë industrinë e riciklimit si prioritare dhe pasuri të cmuar kombëtare.
 

“Industria e riciklimit në vend është e interesuar që të plotësohet kuadri ligjor dhe standartet njëlloj si për homologët e saj në vendet e BE.
-Industria e riciklimit po asfiksohet nga mungesa e lëndëve te para , për arsye se ato nuk gjenden mjaftueshëm brenda vendit për shkak të mungesës së ndarjes në burim te mbetjeve.
-Shoqata e ricikluesve është në mbështetje të plotë të investimeve të huaja në fushën e riciklimit në vendin tonë. Shpresojmë që prononcimi i djeshëm i deputetit te Partisë Socialiste, z.Erion Brace , të jetë opinioni i tij personal dhe jo qëndrim politik i PS.Ne kërkojmë që klasa jonë politike e cdo krahu qoftë ajo, të inkurajojë investimet e huaja në Shqipëri dhe të konsiderojë industrinë e riciklimit si prioritare dhe pasuri të cmuar kombëtare” thuhet në deklaratë.
 

Më tej Shoqata e Ricikluesve te Shqipërisë kërkon me forcë nga qeverisja qëndrore dhe pushteti vendor, të aplikojë sa më parë menaxhimin e integruar të mbetjeve në vendin tonë sipas ligjit te miratuar për këtë cështje, gjë që do të sillte përfitime mjedisore dhe sigurim të lëndëve të para për këtë industri.