Shpërthen makina-bombë para stacionit të policisë në Meksikë, 6 persona të plagosur

Një makinë-bombë ka shpërthyer të dielën në mbrëmje përpara një stacioni policie në Meksikë, duke plagosur gjashtë persona dhe shkaktuar dëme të konsiderueshme në objekt dhe ndërtesat përreth.

Shpërthimi ndodhi në qytetin Ojocaliente, në shtetin Zacatecas, një prej zonave më të rëndësishme në rrugët e trafikut të drogës në Meksikë.

Sekretari i qeverisë së Zacatecas, Rodrigo Reyes, deklaroi se eksplozivi ishte vendosur në një automjet privat dhe shpërthimi shkaktoi dëme materiale në stacionin policor dhe pronat pranë tij.

Gjashtë civilë mbetën të plagosur, ndërsa autoritetet bënë të ditur se ata po marrin trajtim mjekësor.

Zacatecas konsiderohet një zonë strategjike për grupet kriminale, pasi lidh Meksikën qendrore me pjesët veriore dhe perëndimore të vendit. Rrugët e këtij shteti përdoren si korridore të rëndësishme për kontrabandën e kokainës dhe narkotikëve të tjerë drejt Shteteve të Bashkuara.

Rajoni është përballur prej vitesh me dhunë të lidhur me luftën mes grupeve kriminale për kontrollin e territorit dhe rrugëve të trafikut të drogës.

Edhe pse situata ishte përmirësuar për një periudhë, rastet e dhunës kanë rikthyer shqetësimet. Në korrik, pesë trupa u gjetën të varur në një urë në Pozos de Gamboa, rreth 75 kilometra larg Ojocalientes.

Mes viktimave të dhunës së fundit janë raportuar një ish-kryetar bashkie, nëpunës civilë dhe biznesmenë nga zona të ndryshme të shtetit.

Autoritetet meksikane po hetojnë shpërthimin dhe po përpiqen të përcaktojnë autorët dhe motivin e sulmit.