Shqipëria pranë statusit të BE, Presidenti i KiE: Kandidate potenciale

Zërat ndërkombëtarë shtojnë shpresat për statusin kandidat të Shqipërisë në BE në muajin tetor. Kësaj radhe ka qenë Presidenti i Asamblesë Parlamentare të Këshillit të Europës, Jean-Claude Mignon, i cili gjatë një takimi me kryetaren e Kuvendit, Jozefina Topalli, ka deklaruar se Shqipëria është kandidate potenciale për në BE, ndërsa vlerësoi progresin që ka shënuar Shqipëria gjatë viteve të fundit.
 

"Shqipëria është një kandidate potenciale per t`iu bashkuar Bashkimit Europian. Unë jam një parlamentar francez, dhe sigurisht unë e monitoroj me shumë interes progresin e vendit tuaj në rrugën e integrimit. Dua gjithashtu të përgëzoj kryetaren Topalli për mënyrën sesi e drejton debatin politik në Parlament. Dhe nuk ka qenë aspak e lehtë. Në fakt komitetit të ministrave dhe Asamblesë Parlamentare i është dashur të ndërhyje për tu siguruar që mazhoranca dhe opozita të punonin së bashku. Mendoj se rezultati erdhi falë kontributit tuaj"deklaroi për mediat Presidenti i Asamblesë Parlamentare të Këshillit të Europës, Jean-Claude Mignon.
 

Duke folur në punimet e Konferencës Europiane të Presidentëve të Parlamenteve, kryetarja e Kuvendit Jozefina Topalli , u ndal edhe në procesin për marrjen e statusit të vendit kandidat, duke shprehur besimin se reformat e ndërmarra të mundësojnë këtë hap.
 

“Si shqiptare, objektivi ynë kombëtar është marrja e statusit, por kjo do të sjellë përfitime si për Shqipërinë, ashtu edhe për BE-në duke pasur parasysh vlerat unike të vendit tonë në harmoninë e besimeve fetare dhe dialogun ndërkulturor”theksoi Kryeparlamentarja Topalli.
Kryetarja e Kuvendit të Shqipërisë, Jozefina Topalli ndodhet në Strasburg, ku merr pjesë në Konferencën Europiane të Presidentëve të Parlamenteve që po mbahet për dy ditë me radhë.